Plie paidbah u Bah Hamletson Dohling ïa ka madan ïalehkai kynjat bol ha Myrkhan

0

Shillong, Kyllalyngkot 06 : U MLA barim jong ka Mylliem Constituency bad myntri barim ka sorkar jylla u Bah Hamletson Dohling ha ka sngi Balang u la plie paidbah ïa ka madan Football jong ka shnong Myrkhan, Upper Shillong. Ïa kane ka madan la pynïoh na ka scheme SRWP (2022-23) ha ka Jingmang kaba long 10 lak tyngka.
Haba kren ha ka jingïalang plie paidbah, u Bah Hamlet u la ong ba ka Constituency Mylliem ka riewspah bha ha ka jingdon ki khynnah bad ki samla ïalehkai, khamtam ha ka liang ka jingïalehkai Football. “Kawei na ki kamram ka jongnga, kum u nongmihkhmat ka long ban kyntiew ïa ki samla ïalehkai, ka jingpynbiang ïa ki jaka bad ki madan ïalehkai kiba bha bad kiba paka ka long kawei na ki bynta,”. la ong u Bah Hamlet.
U Bah Hamlet u la pyntip ruh ban pynïoh ïa kane ka madan, la hap ban pynmadan ïa uwei u lumbah bad u la kyntu ruh ïa ki khynnah bad ki samla ka shnong ban pyndonkam hok ïa ka madan khnang ba shisien ka sngi yn sa ïohi ïa kita ki khlur ïalehkai Football kiba mih na ka shnong Myrkhan.
Ha kane ka sngi la sakhi lang ïa kane ka jingplie paidbah da u BDO ka Mylliem Block, Bah A Myrthong, Rangbah Shnong Myrkhan, u Bah P Thawmuit, ki dkhot ka Dorbar Shnong, ki dkhot ka Myrkhan Sports Club lem bad kiwei kiwei.

Leave A Reply

Your email address will not be published.