Nongpoh, Naiwieng 19: Ka MDC ka Umsning Constituency, ka Kong Macdalyne S. Mawlong bad kaba dei ruh ka EM ka KHADC mynta ka sngi ryngkat ka jingsakhi lang ki paidbah nongshong shnong ka la lah ban plie paidbah noh ïa ka sem ap kali ki paidbah Nongshong shnong ka Shnong Sohlaitrim ba hap hapoh ka Umsning Constituency ha Ri Bhoi.
Kane ka Sem ap kali ki paidbah (Passenger shed) ka dei kaba la mang lyngba ka skhim MDC lyngba ka Special Assistance ha ka jinglut kaba la kot sha ka T. 1 lak tyngka jong u snem 2018-2019.
La sakhi lang ruh ha kane ka sngi ba la plie paidbah ïa kane ka sem ap kali ka shnong Sohlaitrim da ka jingdon lang u rangbah Shnong, u Bah Shngainkupar Syngkli, ka Kong Kyntiew Nongsiej, ki nongïalam shnong bad kynthup ki paidbah nongshong shnong ka Shnong Sohlaitrim.
Haba kren ruh ha kane ka sngi, ka Kong Macdalyne S. Mawlong ka pynpaw ba ka jingthmu ban ai ïa katei ka sem ap kali ka long ban pynsuk ïa ki paidbah ba ap kali ha ka leit ka wan bad ka kyrmen shkem ruh ba kane ka sem ap kali kan ai jingmyntoi ïa ki paidbah ban lait na u slap ka sngi haba ki ap ïa ki kali na ka bynta ban leit ban wan kum ki nongshong shnong katei ka shnong.
Ka la kyntu ruh kumba la mang da ka pisa paidbah ban shna ïa kane ka sem ap kali ka la kyrpad ïa ki paidbah ba ki dei ban sumar bad shim ïa ka jingkitkhlieh ban nym pynjot pynpra, hynrei ban pyndonkam katkum ba la mang bad shna ïa ka ban myntoi ki paidbah.
