Phi pyrshah ne kyrshan lynti rel, wan sha ka ‘all party meeting’ ban ai jingmut : Kyrmen Shylla

Shillong, Jylliew 30 : U Myntri ka tnad Revenue and Disaster Management ka sorkar jylla, Bah Kyrmen Shylla ha ka sngi Palei u la ong ba kam don jingpher la kiwei ki party ki kyrshan lane pyrshah ïa ka lynti rel hynrei kaba kongsan ka long ba kin wan lang sha ka all party meeting ba khot da ka sorkar ban ïathir ïatai sani halor katei ka phang.
Halor ka jingdon ki katto katne ki party kiba la pynpaw ba kin ym wan sha katei ka jingïalang ïa kren halor ka lynti rel na ka liang u Myntri u la ong, “ Ban ong ba ym ïa shim bynta kam sngew ïahap satia. Lada phi pyrshah ne phi kyrshan ïa ka lynti rel phi dei ban wan ban shim bynta khnang ba phin ïoh ban ai jingmut lang ym ban shu jah la ka jah.”
Shuh shuh u ong ruh ba haduh mynta ym pat shai mano ba dei mano ban lait kumta dei tang lyngba ki jingïakynduh lang kiba lah ban ïashai bad ruh ban pan jingshai.
Ha kajuh ka por u Bah Kyrmen Shylla u la ïathuh ruh ba haduh mynta ki paidbah ki bteng ban pynpaw ba ki ruh ki kwah ban pynsngew lang ïa ka jingsngew jong ki halor ka lynti rel. “Bun ki paidbah ki kwah ban ïohsngew lang ïa ki jingshah ktah ne ki jingmyntoi lyngba ka lynti rel. Kumta nga sngewdei ba ki ruh ki donlang ka bynta halor kane,” u la ong.
Haba kren pat halor ka jingtieng ïa ka jingwan tur kyrthlep ki mynder sha ka jylla lada wan ka lynti rel, na ka liang u Myntri u la ai nuksa da kaba ong ba ha u snem ba khang tih dewiong ha ka jylla da ki lak ngut ki bar jylla ki leit phai noh sha la ka jong ka jylla namar kim ïoh ban thied jaka ha ka jylla.
“Ka jylla jongngi kadei kaba la ïada da ka Khyrnit ba Hynriew kumjuh da ka Land Transfer Act dei na kata ka daw ki briew kiba wan trei hangne ki hap ban leit phai noh sha la ka jaka lajong namar kim ïoh ban thied jaka ban pynskhem ïa ka jaka shong jaka sah.”
Haba kren pat halor ka ishu lynti rel, u Bah Kyrmen Shylla u ong ba ki don bun ki jaka bym don ILP ruh ki ïoh lynti rel tangba u ïai ban pat ba lada ïoh pat ïa ka ILP ka nang pynkhlain ïa ka jingsngain. U ong ruh ba ki khmih lynti ba ka sorkar pdeng kan sngap ïa ka jingkyrpad jong ka jylla.
“Lada ka sorkar pdeng ka ai ia ka ILP hynrei lada ka lynti rel pat ka buh jingma ne knieh noh ïa ka hok jongngi, balei ban kwah lynti rel. Kumta ngim dei satia ban ïa khleh lang ïa kine ar hajuh,” u la ong.