Phi long ka sharak ban tbeh jingshai na bynta ka synjuk: President MCA

Shillong, Risaw 22: Ka Meghalaya Cricket Association hynnin ka Sngi Saitjaiñ jong ka taïew ba ladep ka la lumlang ïa ki nongïalehkai ka jylla kiba la shah jied ban leit ïakhun sha ka BCCI’s Men’s U-23 State A Trophy lyngba ka prokram “send-off” ban kitbok kitrwiang bad ai mynsiem shuwa ba kin mih napoh ka jylla.
ïa kane ka prokram la pynlong ha madan kriket MCA Ground, Polo tang mar ïadep pyrshang kilanmet jong ki player (practice session) ha ka jingïadon ryngkatlang u Nababratta Bhattacharjee-President ka MCA, u Bah Gideon Kharkongor-Honorary Secretary. Kiwei pat kiba la ïadonrynglang ha kane ka prokram ba la pynlong hynnin ka Sngi Saitjaiñ ki kynthup ïa u Honorary Treasurer Dhrubajyoti Thakuria bad u Bah Macdonald Kharsawian-Apex Council Member Peter , ki nongjied (selector) lem bad ki support staff.
Haba ai jingkren ha kane ka sngi, na ka liang jong u President ka synjuk, u Naba Bhattacharjee u la pynkynmaw ïa ki player ba ki dei ban phaikhmat bad pynkhrehbha ïa lawei bad lashai na bynta ïalade shimet ha ka kriket.
“Phi don mynta ha ka kyrdan jong ka U-23 bad ym slem shuh ba phin lehkai na ka kynhun kiba la rangbah (senior team),” u la ong. “Nga ïohi ba ka kynhun ka don ïa ka mynsiem ïakhun bad kane ka long kaba itynnat ban sakhi. Mynta ngi don ka jingthmu ba bun napdeng jong phi ki ban sa shah kyntiew ha ka kynhun kiba la rangbah (Senior Team). Phi long ka sharak ban tbeh jingshai na bynta ka synjuk. Long kiba la khreh, ïakhun tyngeh, phi don mynta ha ka lynti kaba biang bad man u mawmer ba phi jam ka long ka jingsarong ïa phi hi.”
“Don napdeng jong phi kiba kham tbit ban lehkai ha ka white ball cricket, katba kiwei ha ka red ball. Baroh kin kwah ban lehkai baroh ki jait format bad kin khyndiat ki ban lah hynrei ym baroh. Phi hap ruh ban shim ïa ka rai kaei kaba kham biang ïa phi shimet kaba lah ban btin lynti ïa phi nangne shakhmat,” la bynrap u Bhattacharjee.
Ha kajuh ka por na ka liang jong u Honorary Secretary ka MCA, u Bah Gideon Kharkongor u la pynpaw ba ka donkam ïa ka kynhun ban long kaba ryntih (discipline), namar ka long kaba kongsan haba ïakhun ha madan kum ka kynhun baroh kawei.
Ka kynhun ki rangïalehkai ka Meghalaya kan hap ban ïakhun haduh hynriew tylli ki jingïalehkai group, bad baroh kine yn pynlong ha Chandigarh, naduh ka 28 tarik u Risaw. Ka Meghalaya ka la haplang ha kajuh ka thup ryngkat bad ka Uttar Pradesh, Rajasthan, Assam, Andhra Pradesh, Bengal bad ka Railways.
Na ka liang ka kynhun ka la ïoh ban pynkhreh da kaba kilanmet la katto katne sngi, kaba la sdang naduh 15 tarik u Risaw ka ban sa khylliap noh ha ka 24 tarik u Risaw bad ka kynhun lait noh ki player standbys, kan mih na Shillong ban leit sha Chandigarh ha ka sngi ba bud (25 tarik Risaw, 2023.