Nongpoh, Risaw 22: Kum shibynta ban kyntu ïa ki samla jong ka shnong Banbudai, Ri-Bhoi District ha ki kam ïalehkai, ka Banbudai Sports and Cultural Club, Ri-Bhoi District ka la plie pyrda ïa ka Senior bad Under-13 “Inter-House Football Tournament” ha ka 21 tarik Risaw, 2023 ha kapor 12 baje mynsngi kaba lah pynlong ha Banbudai Playground.
Ia kane ka tournament la wan ban plie pyrda da i Bah Teibok Laloo iba lah long kum u kongsan ha ka jingdonlang jong i Bah D.M. Nongkseh (President, Banbudai Sports & Cultural Club), Bah S.P. Shadap (Rangbah Shnong, Banbudai) bad i Tbn. B.D. Laloo.
La pynïaid ïa kane ka program da i Bah P.K. Laloo ha kaba lah ïoh ruh ïa ki jingkren pdiang burom na i Bah D.M. Nongkseh (President, Banbudai Sports & Cultural Club). La ïoh ruh ïa ka jingkren na i Bah S.P. Shadap (Rangbah Shnong, Banbudai) iba la kyntu kynpham ïa ki khun samla jong ka shnong ba kin long kiba don akor bad ban kiar na ki jingsniew ba bunjait kiba long ka jingpynduh mynsiem ïa ka lawei ka jong ki.
I Bah Teibok Laloo iba long ruh kum u kongsan ha katei ka jingplie pyrda ïa katei ka Tournament ha ka jingkren jong i, i la ai ka jingïaroh ïa ka sports club ba lyngba jong kane ka club shibun ki khynnah samla jong ka shnong kin ïoh ïa ka lad ban pynpaw ïala ka jong ka sap bad i kyrmen ruh ba ka sap jong ki kan ym kut tang ha shnong hynrei ban ïohi ruh ba ki long ki khlur ialehkai ba pawnam wat shaduh shabar jong ka jylla ruh. La ïoh ruh ïa ka jingkren ai khublei na i Bah P.B. Syiem bad la ïoh ruh ban rwai ïa ka Ri-Bhoi Anthem ha shwa ban sdang ïa ka football tournament.
Kane ka tournament ka lah sdang naduh ka 21 tarik Risaw, 2023 bad yn pynhap pyrda ha ka 22 tarik Nohprah, 2023.
