Phi beiñ ba ngi kut tang ha Khanapara, ngi ruh ngin pynkut ïa ki National Party tang ha Khanapara: Bright

Laitdom, Mairang: U MLA jong ka Mawlai, u Bah Brighstarwell Marbañiang haba kren ha ka jingïalang ïalap elekshon ha Laitdom, kaba hap ha Mairang Constituency, u la ong ba borabor la ju ïoh sngew ba ki nongïalam na ki Nationalk Party ne ki Seng na rithor, kiba ju beiñ ïa ki Seng Riewlum ba ki kut tang ha Khanapara, hynrei da ka jingmih ka VPP ban pyrshah ïa ka jingkren Hindi jong u Lat ha Assembly, kiwei pat ki bynta jong ka ri India ki la tip lut ïa ki Seng Riewlum, khamtam ïa ka VPP.
U Bah Bright, ula ong ba ha ka Workshop jong ki MLA ka ri India kaba la long ha Mumbai, haba u la ïakynduh ïa ki MLA na ka thaiñ shatei lammihngi bad ïa ki MLA na South India, kiba bun ki la kylli shaphang ka Seng VPP kaba la ïeng pyshah ïa ka jingkren Hindi u Lat.
Mynta ba ki National Party ki kren beiñ ba ki Seng Riewlum kut tang ha Khanapara, ka VPP ryngkat ka jingkyrshan jong u paidbah kan pynkut noh pat ïa ka jingtreikam jong ki tang ha Khanapara. “Ngin synshar dalade ïalade ïa la ka jong ka jylla”, u la ong.
Shuh shuh u MLA ka Mawlai, u la ong ba da ka jingkyshan ka BJP ïa ka NPP ki paidbah ki la ïohi shai ïa ka dur ba shisha jong ka NPP kaba dei tang ka dur bula jong ka BJP. Nakata daw ka ki paidbah kidei ban long kiba sian bad kiba bishar bha, ïoh ba ka ri ka shah tyllep ha ki mynder lyngba kine ki dur bula. U la pynkynmaw ruh ba ym tang ka NPP kaba dei ka dur bula, hynrei kiwei pat ki Seng Riewlum kum ka UDP bad ka HSPDP ruh kidei lang ki dur bula ka BJP namar ba ki ïatreilang ha ka sorkar MDA I bad ka MDA II. “Lada phi kwah ban ïoh ïa ka Seng Riewlum kaba nylla jied beit ïa ka VPP kaba dang khuid dang thymmai bad ym pat ïakyrsum badno badno ruh”, u la ong.