Shillong, Nailur 15 : U Myntri Rangbah ka Jylla Conrad K Sangma, mynta ka Sngi Thohdieng, ula pyntip ba ka Sorkar Jylla ka la phaikhmat mynta sha kiwei ki thaiñ jong ka Jylla ban pyntreikam ne wanrah ïa ka lynti rel.
Kane ka la mih hadien ba ka jingthmu wanrah lynti rel ha Ri-lum Khasi bad Jaintia, ka la mad ïa ka jingpyrshah kaba jur na ki kynhun bapher bapher kynthup ki Sengbhalang kiba khuslai ïa ka jingwan rung kyrthep ki mynder ri.
U Conrad haba ïakren bad ki nongthoh khubor, ula ïathuh ba ki briew ka Northeast Frontier Railway (NFR) ki la kren ïa kaba dei ba kam mih satia kano kano ka jingkylli ban pynduh noh ïa ka lynti rel lane ka jingkylli ban shu pyntrei donbor ïa ka.
Ula ong ba ka project ba nyngkong ( Ha Ri-lum Khasi) ka la mad ïa ki diengpyngkiang namar ki la don ki jingeh ha lynti ïaid jong ka bad ka Sorkar kan hap ban pynbeit ïa kine ki jingeh kaba lah ban shimpor.
“Ia ka mynta, katto katne ka song pisa ka la don ban pyntrei ïa ka project lynti rel hynrei namar ki kam kim shym la ïaid shakhmat, ka Sorkar India kan sa buh jingkylli ba sa katno por yn shu buhkai ïa kane ka pisa. Kumta, ngi hap ban pyrkhat la ngin pynphai noh lane pyntreikam noh sha kiwei ki jaka hapoh ka Jylla bad ban pyrshang pyndonkam ruh ïa kane ka pisa ba kan ym shu sepei kai….kumta, ngi la pyrshang ban wad lada don kiwei ki thaiñ ka Jylla, kiba kloi ban pdiang ïa ka lynti rel bad kane ka jingïawad ka la ïaid shakhmat” ong u Conrad.
“Nga la pynpaw ïa kane kajuh ka jingsngew sha u Myntri lynti rel ka Sorkar Pdeng bad u Myntri ula ong ha nga ba u kloi ban pdiang ïa kane ka jingtyrwa. Kumta, ngin hap ban bishar na kane ka liang bad peit lada don kiwei ki project kiba ngi lah ban pynïaid shakhmat bad lada don, ngi kwah ban pyntrei noh ïa ki lym kumta kan long ka jingduhnong ïa ka Jylla haba phai sha ka pisa namar ka pisa ka la poi na ka bynta ki katto katne ki kam jong ka lynti rel” ula bynrap.
Nalor kane, u Myntri Rangbah ula ong ba lada phai sha ka roi ka par, baroh ki kwah ban ïohi ba ka lynti rel ka dei ban wan sha ka Nongbah bad kan kyntiew bha ïa ki lad pynïasoh, ka khaïi ka pateng bad ka ïoh ka kot.
“Ki don bun ki jingtynjuh, ki don ki jingsngewkhia na ki kynhun bapher bapher bad kumta ngi kwah ban ïasyllok shuwa bad baroh ki kynhun bad hooid ym shym la don mano mano ruh ba ong ban shu buh sah ïa ka hynrei ka ishu hangne ka long ba ka pisa ka la shu sah na ka bynta ki katto katne ki project” ula ong haba bynrap “Namar ka dei ka kam ba nyngkong eh ka bym shym la ïaid, ngin hap ban ïaid da kiwei pat ki sienjam bad ha kajuh ka por ngin dang ïai bteng ban ïakren bad ban wad ïa ka lynti ba ïasngewthuh jingmut lang ba kumno ngin lah ban pynïaid shakhmat ïa ka project namar ka lynti rel ka dei kaba biang eh ïa ka Jylla bad ka dei kaba lah ban pyntrei da ki bynta bynta….baroh ki lad ki lynti ki don”.
Haba kylli la ka jingpyntreikam ïa ka ILP kan plie lynti ïa ka jingwan ka lynti rel ha Ri-lum Khasi bad Jaintia, u Conrad ula ong “Ka ILP ka dei ka aiñ ka ban pyrrkhing ïa ka jingrung ki briew ba nabar ka Jylla hynrei ki don ruh kiwei ki lad ki lynti kiba lah ban leh eiei halor kane ka jingsngewkhia”.
“Kumta…ka ILP kam dei eh ka mat ba sngewkhia, ka jingsngewkhia hi ka dei ka jingwan rung beaiñ ki mynder bad ki bar Jylla bad ki briew ki sngew ba ka ILP lane don ki kynhun kiba sngew ba ka ILP ka ïarap ha ka ban tehlakam ïa kine ki jingsngewkhia. Ki don ruh kiwei ki lad ki lynti bad dei na kata ka daw ngi la wanrah ïa ka MRSSA bad kiwei kiwei ki lad. Namar kata ka jingïakren ka la don bad ki Kynhun bapher bapher ki la buh ïa kine ki kyndon, to ngin sa ïakhmih kumno ki kam ki ïaid. Ngin dang ïai ïakren bad ngin pyrshang katba lah ban pynbeit noh ïa kane ka kam” ula ong.
