Bym kheiñ snep ki bar jylla ïa ka KHADC, khang tala u CEM haduh 46 tylli ki dukan ha Byrnihat

Nongpoh, Nailur, 15: Ka Executive Committee jong ka Khasi Hills Autonomous District Council hapoh ka jingïalam jong u Chief Executive Member (CEM) u Bah Pynïaid Sing Syiem ryngkat ka jingsynran lang jong ki Executive Member ba kynthup ïa u Bah Victor Rani bad u Bah Alvin Sawkmie lem bad ki ophisar, ki Pulit enforcement ki la khang tala haduh 46 tylli ki dukan jong ki bar jylla ki bym don ïa ki kot ki sla kiba biang ha ka jingkhynra ha ka sngi Thohdieng naduh Byrnihat shaduh Khanapara.
Ïa u CEM ka KHADC bad ïa ki EM la synran lang da ki dkhot sengbhalang ba kynthup ïa ka KSU bad ka HNYF.
Ha ka jingkhynra, la lap ruh ba ki bar jylla kim don satia ïa ki kot ki sla la bun bun snem hynrei ki la khaïi sahuh khlem kheiñ snep satia ïa ka iktiar jong ka District Council.
Ka jingbym burom jong ki nongkhaïi bar jylla ïa ka District Council wat hadien ba ladep ai ka jingpyntip, ka la pynlong ïa u CEM ka KHADC ban khang khyrdep syndon ïa ki 46 tylli ki dukan naduh 13 mer, 14 mer, Mawsmai.
Ha ka jingtohkit, la nang lap shuh shuh shibun tylli ki dukan bar jylla ki bym don ïa ki kot ki sla ha kaba ka District Council ka la aipor shi taiew ba ki pynbiang bad ïa mynta shipor ki hap ban khang khyrdep shuwa katba kim pat lah ban pynbiang ïa ki kot ki sla.
U Bah Pynïaid Sing Syiem ha ka jingïakren bad ki lad pathai khubor u la ong, “ngi la shim ïa ki kyrteng jong ki (nongkhaïi bar jylla) katkum ki kyndon aiñ bad la bthah ïa ki ban wan mih sha ka Council hadien ba ka jingai por kim shym la wan mih satia bad dei halor kata ngi la phah ruh ïa ka Closure Notice bad mynta sngi ngi hap ban wan khang khyrdep syndon ïa kine ki dukan ki bym kheiñ snep bad burom shuh ïa ka Council naduh 13 mer ter ter.”
“Ka Council ka ai khublei kyrpang ïa ka KSU bad ka HNYF tang shu ioh jingtip halor ka jinghiar jong ngi kum ka Council ki la wan synran lang ban pynshngaiñ bad ïatreilang,” ong u Bah Pynïaid.
U la ong ba kane ka jinghiar khynra ïa ki dukan ka la long ruh ka jingmyntoi ban tip bad iohi da la ki jong ki khmat ba dang don shibun ki dukan bar jylla kiba khaïï khlem kot khlem sla bad la bthah ruh ïa ki ophisar ba ki dei ban phah Notice lut sha baroh ki dukan bar jylla bad ban ai por shitaiew ban pynbiang ïa ki kot ki sla hynrei lym kumta yn khang khyrdep syndon ïa ki.
Shuh shuh u ong ba ka Council kan dang ïai buddien ha kaba ïadei bad ka Trade License namar ïa ka jaitbynriew Khasi mynta la shah hiar thma ha ka khaïi ka pateng namarkata ngi donkam ban pynkhlaiñ biang sa shisien ïaka khaïi ka pateng para Khasi. Kane ka jingleh jong ka Executive Committee ngi ngeit skhem kan nang ai mynsiem pat ïa ki samla kiba donsap ha ka kam khaïi pateng ba kin wan shakhmat ban ioh ban knieh biang ïa ki kam khaïi ba la leh da kiwei pat ki jaitbynriew namar katkum ka United Khasi Jaiñtia Hills trading by non-tribal Regulation Act ba kino kino ki kam ba la lah da ki khasi ban trei ngi hap ban weng noh ïa ki license ba la ai sha kiwei pat ki jaitbynriew.
Ynda la poi sha ka thaiñ Khanapara u CEM u la pynpaw ka jingsngewkmen ban iohi ba ki longkmie hapoh ka shatri ka Border Welfare Committee (BWC) ki la pdiang burom ïa u hynrei kaba sngewsih ban ioh jingtip ka long ba ki Khasi ba shong ba sah ha kane ka jaka ki don tang kumba 25 iing bad kam long ka ba suk ïa ki ban im ha katei ka thaiñ khappud mar syndah bad ka sor Guwahati.