Kyntait ka Assembly ïa ka jingdawa ki MLA ka VPP ban pynjlan ïa ki sngi shong dorbar

Shillong, Nailur 15: Ka ïingdorbar Thawaiñ ka jylla ka la kyntait ïa ka jingdawa ki MLA ka VPP ban pynjlan ïa ki sngi shong dorbar da kaba aidaw ba ka por ba la buh ka lyngkot palat.
U MLA ka North Shillong Constituency u Bah Adelbert Nongrum, u la wanrah ïa ka motion ban pynkylla ïa ka Calendar jong ki sngi shong Dorbar namar u la ong ba por ka lyngkot than ban ïakren ïatai halor kiba bun ki mat kiba ktah ïa ka jylla bad ban phah biang ia ka Calendar sha ka Business Advisory Committee jong ka Assembly ban kham pynjlan ïa kane ka sien shong Dorbar .
Ïa kane ka ammendment motion jong u Bah Adelbert Nongrum la kyrshan da u MLA ka Nongkrem u Bah Ardent da kaba ong ba ka jingkhmih lynti ki paidbah ba kum ki MLA ha ka Liang pyrshah kin rah ïa kiba bun ki mat kiba ktah ïa u paidbah bad ka jylla baroh kawei.
Haba jubab ïa kane na ka liang u Myntri ka Parliamentary Affairs u Bah Prestone u la ong ba ka Business Advisor Committee jong ka Assembly ka la rai ba lada don ka jingdonkam na ka Liang u Lamphang u lah ban pynjlan man ka sngi da kumba 2 ne lai kynta man ka sngi khnang ba ki MLA kin ïoh rah ïa ki mat jong ki bad u la ai jingmut ruh ba ki MLA ka Liang pyrshah ki dei ban don ka jingïatreilang hapdeng ki para MLA Liang Pyrshah ba ki jingkylli, ki motion, ki Resolution bad kiwei ki mat ba ki rah kin ym ïatyngkhuh kawei ka mat ba la rah da uwei u MLA bad kajuh ka mat yn rah sa da uwei pat.