Phah tohkit u DC halor ka jingujor ki khynnah skul JNV Niangbari ba ïoh bam pyut bad dawai dier por

Nongpoh, Naitung 31 : U Deputy Commissioner ka Ri-Bhoi District Arpit Upadhaya, ula phah tohkit ha ki Heh Ophisar jong ki tnad bapher bapher kynthup ka District Food Inspector bad PHE ban pynshisha ïa ka jingujor jong ki Khynnah Skul ka Jawahar Navodaya Vidyalaya (JNV), Niangbari.
“Hadien ka jingmih ha ki lad pathai khubor, nga la khot ïa ki Heh Ophisar jong ki Tnad bapher bapher bad la bthah ïa ki ba kin leit jurip bad tohkit halor ki jingujor jong ki Khynnah skul ka JNV khamtam eh halor ka jingïoh ïa ka bam ba khawot, ba sma bad ka umbam umdih ba saw sarang” ong u DC uba dei ruh u Chairman ka JNV, Niangbari haba iakren bad u nongthoh khubor.
Dang shen, ki Khynnah Skul ka JNV ki la phah ïa ka jingujor sha ka seng FKJGP-North Khasi Hills, ba pyntip ïa ka jingshah leh beiñ ha ki bor pynïaid ka skul, kiba ai ïa ka bam kaba khawot, ba sma, ba pyut bad ka umbam umdih kaba saw sarang. Ki la kynnoh ruh ba wat ki dawai dashin la ai da kiba la kut ka por treikam bad ka jingbym ai ïa ki sanitary pad ha ka por ba biang sha ki khynnah kynthei.
“Haba bishar ïa ki dur ki dar bad ki video kiba la mih ha ki lad pathai khubor, ka long shisha kaba sngewkhia jur ba ki Khynnah kin hap ban mad ïa kum kine ki jingeh” ong u Arpit.
“ Nga la khot ïa ki Heh Ophisar jong ki Tnad bapher bapher ba nga la bthah ba kin leit jurip sha katei ka skul bad ban aiti ïa ka kaiphod sha u hapoh ka arsngi” ula ong haba bynrap “Hadien ba ïoh ïa ka kaiphod, ngan sa bishar bad sa leh ïa kaba donkam”.
Halor ka jingujor ïa ki hostel bad ki jaka leit bar, u Deputy Commissioner u pyntip ba un sa shong bishar bniah ïa kane ka kam bad ki bor pynïaid ka JNV ba kin shimkhia mardor ha kaban pynbeit ïa ki khnang ba ki khynnah kin nym mad shuh ïa ki jingeh.
Halor ka jingujor ki Khynnah ba u Principal ka JNV um ju poi thikna sha skul kynthup ruh ki Nonghikai, une u Khliehduh ka District ula ong “Kum u Chairman ka JNV, ngan sa tohkit bniah ïa kane…ki Nonghikai kim dei satia ban shu pep skul khlem kino kino ki daw ba biang bad ka dei ka kamram jong ki ban peit ïa ka bha ka miat jong ki Khynnah skul”.
Ka FKJGP-NKH mynta ka sngi ka la leit ruh ban buh da ka jingujor hakhmat une u khliehduh ka District bad Chairman ka JNV halor ki jingshem jong ka seng na ka jingleit jurip ïa kane ka skul dang shen.
Ka Seng hapoh ka jingïalam u Information Secretary Bah Ricky Majaw bad Education Secretary Gabriel Sun, kila dawa ruh ïa u DC ba un shim khia mardor ha kaban pynlong ïa ka jingtohkit kat kum ka jingujor jong ki Khynnah skul.