Phah ktien ka sorkar sha ka HNLC ban wan ryngkat u Chairman bad GS sha ka jingïakren ïasuk

Shillong, Nailur 04 : U Symbud Myntri Rangbah ba khmih ïa ka Tnad kam Pohïing (Police) u Bah Prestone Tynsong ha ka sngi Nyngkong, ula pyntip ba ka Sorkar ka la dep ban phah ktien sha ka seng Hynniewtrep National Liberation Council (HNLC) ba ka kwah ïa u Chairman Bah Bobby Marwein bad u General Secretary Bah Sainkupar Nongtraw ba kin donlang ha ka jingïakren ïasuk ka ban wan.
Haba ïakren bad ki nongthoh khubor, u Bah Prestone ula ong ba ka rai mynta ka shong ha ka HNLC bad ka Sorkar ka apktien na ki ban pynïaid shakhmat bad ka jingïakren ïasuk.
“Ngi dang apktien na ki (HNLC). Ngi la dep ban aiktien sha ki. Mynta ka rai ka shong ha ki” ula ong.
Haba kylli ba lano ka kylla ba-ar jong ka jingïakren ïasuk kan long, u Bah Prestone ula ong “Na kata ka daw ka Sorkar ka dang ap ïa ka jubab na ki bad ban buh ïa ka tarik. Ngi kwah eh ba ha ka sien shong jingïalang ban wan, la kumno kumno ruh u Chairman lane u General Secretary ki dei ban ïadonlang ha ka jingïakren”.
“Halor ka jingïakren ïasuk bad ka HNLC hi, nga kwah ban pynthikna ïa ki sa shisien, nga kwah ruh ban kyrpad ïa baroh khamtam ki Nongïalam ba halor ba kin sngewbha ban wan shakhmat, ngi dang ap ïa phi na ka Sorkar Jylla bad Sorkar Pdeng ban pynlong biang ïa ka jingïakren kaba ngi kwah ban don” ula bynrap.
Kane ka jingkynthoh u Symbud Myntri Rangbah kala mih hadien ba ka HNLC ka la pynpaw ïa ka jingpyrshah kaba jur halor ka jingkhot hajir u General Secretary Bah Sainkupar Nongtraw katba ka jingïakren ïasuk ka dang ïaid shakhmat.
Ka HNLC kala dawa ruh ïa ka Sorkar ban mynjur ha ka ban map noh ïa baroh ki kyndon ba la pynngat ïa ki Nongïalam lym kumta ka Seng ka lah ban weng noh ïalade na ka jingïakren ïasuk.
Haba kylli halor kane, u Bah Prestone ula ong ba ka notice khot hajir kam dei kaba khot da ka Sorkar hynrei ka dei tang ka kam ba ju leh da ka ïing Bishar
Kat kum ka jingong jong u, ka Judiciary bad ka Executive ki dei kiba ïatrei ha la ki jong ki jong ki kam.
“Nga tharai phi sngewthuh ïa kane hynrei phi ïohi ba ngi la shong ïa ka jingïalang ïakren ïasuk jong ka kylla ba nyngkong. Ka Sorkar Pdeng bad Sorkar Jylla ki la kyrpad ïa ki ban sngewbha pynsted noh ha ka ban pyntip ïa kiei ki ishu ba ki kwah ban ïakren. Ngi dang ap ïa kata ruh” ula ong.
“Ha ka jingshisha, ka jingkyrpad jong nga ïa ka HNLC sa shisien ka long ba kin shimkhia shisha ïa ka kam, wan shakhmat, ngi dang ap ïa ki bad ngin sa ïakren pat. Kumba nga ong ha phi, kim dei ban khuhslai halor ka warrant ba la ai da ka ïing Bishar ne ka jingkhot hajir jong ka ïing Bishar. Kane ka dei ka kam ba ju leh da ka ïing Bishar” ula bynrap.
Halor ka jingdawa ka HNLC ban map noh ïa ki jingpynngat kyndon, u Symbud Myntri Rangbah ula ong “Ha ka kylla ba nyngkong jong ka jingïakren ïasuk, ngi la ïakren ïa baroh kine ki ishu. Ngi la pynpaw ruh ba ngi kwah ban ïakren bad ki Nongïalam kiba hakhlieh duh ym tang u Vice Chairman. Lada ki shimkhia shisha, ka Sorkar Jylla bad Sorkar Pdeng ki da shimkhia shisha bad nga kyrpad ïa ki ba kin aiktien ïa ka rai jong ki lyngba u nongmihkhmat jong ki. Ngi long kiba la khreh ban nang ïashong jingïalang ha ki sngi ban wan”.
Haba kylli, u Bah Prestone ula ong “Ka kam bymman ka dei ka kam bymman. Ngam tip kaei kaba phi mut da kaba ong ki kam bymman ba shyrkhei (heinous). Ka kam bymman hi ka dei ka kam bymman kam pher la ka dei kaba heh ne kaba rit. Kan hap ban shah tynjuh ha ka Aiñ”.
“Kaei kaba nga ong ka long ba ka aiñ kan ïaid hala ka jong ka lynti. Haba don ki kam bymman, ngi hap ban leh ïa kata bad kam don lynti da kumwei pat”.