Nongpoh, Nailur 08: Ki Pulit jong ka Umiam Police Staion ha ka Sngi u Blei ki la lap ïa kawei ka metïap jong ka longkmie kaba la per ha pung Umiam.
Katkum ka jingtip ba la ïohlum, kane ka longkmie ka dei kaba la tip kyrteng kum ka Diamond Chyne 67 snem ka rta na ka shnong Nongmensong, Shillong bad ka la jah na la iing naduh ka 7 tarik mynta u bnai hynrei la lap noh ïa ka met ba la per ha pung Umiam ha kaba la suba ruh ba ka longkmie ka la ngam jyllop namar ha ka jingtohkit ki Pulit kim shym la lap satia ban don dak mong eiei ha ka met.
Shuh shuh ïa ka met jong ka longkmie la rah noh sha Nongpoh Civil Hospital Nongpoh na ka bynta ban leh ïa ka Post Mortem bad na ka liang jong ki bahaiing ki la kyrpad ban pynlait noh ïa ka post mortem namarba kim shym la suba sniew eiei ïa ka rukom ïap jong ka bad na ka liang jong ki Pulit ki la aiti noh ïa ka met sha ki bahaiing ba hasem ban pyndep ïa ka jinglehñiam ba khatduh.
