Shillong, Nailur 08: Ka jingshim rai jong ka sorkar jylla ban pynjlan ïa ka samoi treikam jong ki ar tylli ki ADC ha ka jylla kiba kynthup ïa ka Khasi Hills bad Jaiñtia Hills kan ym bthat satia ïa ka bor jong ki paidbah bad kumjuh ruh jong ka seng Voice of the People Party (VPP) bad kane kan ym ktah satia ïa ka seng, ong u nongaiktien ka VPP u Bah Batskhem Myrboh.
Ha kaba ïadei bad kane na ka liang jong u Bah Myrboh u la ïohi ba kane ka jingpynjlan ïa ki samoi treikam jong ka KHADC bad JHADC kum ka lynti ban pynpra ïa ka jingbun paid bad jingbun ki nongkyrshan ka VPP. “Mynta ki pyrkhat ba da ka jingpynslem ïa ki elekshon kan pynduna ka jingieid jong ki paidbah ïa ka VPP party. Kim tip ba ki paidbah mynta ki ap kmang sa shisien pat ban pynshitom ïa ki party kiba don ha ka bor,” ong u Bah Myrboh.
U la ong ba lah ban ïohi ha ka elekshon MP kaba dang shudep ba ki briew ki la angnud ban pynshitom ïa ki seng saiñ pyrthei kiba don ha ka bor.
U Bah Myrboh u la ong ba ka sorkar ka la ai daw ba ka dang don ka kam ban phiah ïa ki constituency. “Hato ki MDC kim tip ïa ka jingdon ki briew ha ki constituency bapher bapher? Ki la kynnoh ruh ïa ki briew ba ki la ïohpdiang ki jingujor bad ki jingkyrpad na ka bynta ban phiah ïa ki constituency,” u la ong.
“Katei ka jingpynshisha jong ki kadei kaba dkoh bad kan don nongrim haei haei ruh, bad ka long kumba kheiñ poh ïa ka jinglah jong ki briew ban pyrkhat,” u la ong da kaba bynrap, ba kito kiba don ha ka bor ki dei ban ailad bad burom ïa ka jinglah jong ki briew ban pyrkhat ha kaba ïadei bad kane ka kam.
“Ka jingpynjlan ïa ka ïing ka long kumba khñoit ïa ka hok ki paidbah ban jied ïa ki nongmihkhmat ha ka por ba ki dei ha kaba kane ka long pyrshah ïa ka riti synshar paidbah,” ong u Bah Myrboh.
Lah ban ong ba ka jingpynjlan ïa ka samoi treikam jong ki artylli ki ADC ka la treikam naduh ka 5 tarik, 2024 mynta u bnai bad kan kut haduh ka 5 tarik u Lber, 2025.
