Shillong, Nailur 08 : Ka Synjuk Samla Katholik Nativity Parish Mawkyrwat Shillong Unit ha ka Sngi U Blei ka la pynlong ïa ka jingïakynduh lang (Fresher Meet) kaba Saw ha Sacred Heart Theological Collage Mawlai Phudmuri Shillong.
Ïa kane ka sngi la sdang da ka Mass Bakhuid ha kaba la pynbynta da u Parish Priest Mawkyrwat u Fr Alphonse Wahlang ha ka jingdon lang u Spiritual Director ka Synjuk u Fr Aibor Nongsiej.
Haba pharia ïa ka Ktien jong u Blei, u Fr Alphonse Wahlang u la kyntu ïa ki samla ban ïeng skhem ha ka nongrim kaba ki don kum ki khun Khristan.
U la ong ba kum ki samla kin kynduh bun ki jingeh khamtam ki jingpynshoi kiba lai phew jait kin wan ban khring ïa ki.
“Hynrei lada ki skhem ka jingngeit kine kim long eiei. Phi lah ban thom ïa ki khlem ka jingeh,” u la ong. Nalorkata, u ong ruh ba kum ki samla ki dei ban long kiba shai ka ka jingmut jingpyrkhat ym ban sah dum sah, hynrei ban long kita ki jingshai na ka bynta ka dong ka thaiñ.
U Fr Alphonse u la bynrap da kaba ong ba ha ka wei ka sngi kin sa long ki Nongïalam jong ka dong ka thaiñ ha ki bynta bapher bapher la ka dei lyngba ki kam kiba ki trei ne ki wei ki bynta. U ong ruh ba ki jingjia ba harukom ba ki kynduh ha ka jingim kim dei ban jop ïa ki lane lah ban ïalam bakla hynrei ban phrang shuh shuh ba ki lah ban long ki nongprat lynti ïa kiwei pat na ka shnong bad ka dong ka thain ba ki mih.
Ha kane ka sngi la pynskhem ruh ïa ki nongkitkam ba thymmai bad ruh ka prokram ba kyrpang ha kaba u Bah Kynpham Kharlyngdoh u la long kum u kongsan ha ka jingdonlang ki wei de ki riew Rangbah.
Ha kane ka sngi ka Synjuk ka la pynkup burom ruh ïa kito ki samla ba pass bha ha ki eksamin bapher bapher bad ka pdiang sngewbha ïa kito ki samla pule kumjuh ki samla kiba wan trei ne kiba dang wan thymmai hangne ha nongbah Shillong.
