Pdiang burom ka tnat ïalehkai ka jylla ïa ka kynhun ki rangïalehkai U-18 kiba la jop takma ksiar na ka Khelo India Youth Games 2024

Shillong, Rymphang 01: Ka tnat ba dei khmih ïa ki kam ïalehkai jong ka sorkar jylla hynne ka sngi ka la pdiang burom ïa ka kynhun ki rangïalehkai ba mihkhmat ïa ka jylla kiba la rah namlahduh ha ka phutbol jong ka Khelo India Youth Games 2024.
ïa baroh ki rangïalehkai ka kynhun la pynkit halor ka trok kaba la pynitynnat na bynta ban ïaid kylleng ka sor shillong kaba la sdang naduh Mawlai kaba la pynkut ha Madan MFA 3rd Ground, Polo.
Ha kane ka sngi pdiang burom la ïadonryngkatlang ka Director jong ka tnat Sports & Youth Affair ka sorkar Jylla-ka Kong Isawanda Laloo, u Working President jong ka MSOA-u Bah John F Kharshiïing, General Sec. MSOA-u Bah Finely Pariat, President ka Meghalaya Football Association-u Bah Hamletson Dohling, General Sec. MFA-u Bah Sunesh Syiem, Tresurer-MFA-u Bah Prosper Warjri, u Assistant Director ka tnat ïalehkai-u Bah Paia War Nongbri lem bad kiwei kiwei.
Haba ai jingkren ha kane ka sngi na ka liang jong ka Kong Isawanda Laloo ka la pynpaw ïa ka jingsngewkmen ban ïadonrynglang ban pdiang burom ïa kane ka kynhun da kaba ong, “Kane ka long ka sngi kaba sngewtynnat ïa ka jylla ban pdiang burom ïa phi namar mynta ka sngi phi la dei shisha ki khlur jong ka ri kiba la wanrah ïa ka nam ka burom da kaba khur ïa kane ka trophy na bynta ka jylla.”
“Lyngba ka jingtrei shitom ka jong phi ka jylla ka la ïoh ïa ka nam bad ka burom ïa ka jylla, bad kam dei kaba suk ban poi sha ka burom ha kaba bun ki jylla ki ïashimbynta ha kane ka lympung. Khublei shibun eh ïa ka jingïakhun doh-ïap jong phi bad khamtam eh ïaka jingïatylli ka kynhun ban poi shaduh ka thong,” la bynrap ka Kong Isawanda Laloo.
Na liang jong u Bah Hamlet haba ai jingkren ha kane ka sngi, u la ai khublei kyrpang ïa ki rangïalehkai khamtam ïa ki coach kiba la trei shitom miet bad sngi ban jied ïa ki rangïalehkai ban mih madan ha katei ka lympung.
“Ngi na ka liang jong ka MFA ngi sngewthikna mar ïa dep ai khublei ba kane ka kynhun ka dei kaba don jingkyrmen, ngi peit ïa ki player, ngi peit ïa ka jinglong ryntih ka jong ki bad kane ka jingkhmihlynti ka jong ngi kam shym long kaba lehnoh-ei,” la ong u Bah Hamlet.
Shuh shuh u la ong, “Ki don shibun ki player kiba la trei shitom ban pyni ïa ka sap ka phong ka jong ki, namar ban ïohrung hapoh ka Khelo India Youth Games kam dei kaba suk, bad tang phra tylli ki jylla kiba ïoh ban ïalehkai, nalor ba phi la lah ban ïohrung sha ka thup ki 8 kynhun phi la lah pat ban wanrah syndon ïa ka nam bad ka burom ïa ka jylla hi baroh kawei”.
“Ka jylla baroh kawei khamtam kiba ieid ïa ka phutbol -Ngi sngewsarong na bynta ka jong phi. Kane ka burom kaba phi la wanrah ka long kaei kaei kaba ngin ïai pyrto na ka por sha ka por bad kane ka burom kaba phi wanrah, ngeit ruh ba kan long ka nuksa na bynta ki rangïalehkai phutbol kiba don ka jingangnud ban ïalehkai,” la pynkut u Bah Hamlet.
Kumban shu pynkynmaw, ka kynhun ka la ïoh ban rah ïa ka namlahduh dei hadien ba ka la pynliem da 2 kol ïa ka Punjab ha ka jingïakhun final kaba la long hynnin ka 31 tarik u Kyllalyngkot ha madan Jawahalal Nehru Stadium kaba ha Tamilnadu.
Shuwa ba kan jam sha ka final, ka kynhun ka la hap ban ïakhun dohïap ha ka semi final hadien ba ka la shah lamkhmat lypa da 2 kol ha ka Jharkhand, hynrei ka la wanphai da kaba tyngeh ban jop ïa ka jingïakhun da 5-3 kol, ha kaba u Mebanlamlynti u la khyrwit haduh 4 kol marwei. Katba ha ka final baroh ar kol la thep da u Badondor.
Na ka liang u Myntri ka tnad Ialehkai, Bah Shakliar Warjri haba kren ha ka jingialang pdiang burom ia kitei ki nongialehkai ha Secretariat u la ong ba ka sorkar ha ka sngi Nyngkong kan sa pynlong da ka prokram pynkup burom ha kaba kin sa sam ruh da ki kynja scholarship sha kitei ki nongialehkai.