Pdiang burom ka MPUF ïa ki nongïalehkai ka jylla ba khur takma na ka MuayThai Federation Cup 2022
Nongpoh, Nohprah 22 : Ka Meghalaya People United Front (MPUF) Ri-Bhoi District mynta ka sngi da ka jingkmen bad ka jingsarong ka la pdiang burom ïa ki rang bad thei ïalehkai Muay Thai ka jylla kiba la leit ban ïashim bynta haka Muay Thai Federation Cup 2022 kaba la long dang shen haka jylla Tripura bad kiba la ïoh khur takma ruh na katei ka lympung.
Ki rang ba thei ïalehkai kiba la khur takma ksiar na katei ka lympung ki kynthup ïa u Blaseibok kharbuli Senior male under-23 (48kg), Rishot skhem marboh, senior male under-23 (57kg), Pynkhrawbor Shylla, Senior male under 23 (45kg), Edilberth Ryndongsngi, Senior male /Elite class (86kg), Alfred Wat Klet Riahtam Senior male /elite class (45kg), Jessica Thabah, Senior female under-23 (63kg), Monica Nongrum senior Female/elite class (67kg), Ebilities Diengdoh Senior female/elite class (60kg) lem bad 6 ngut kiba khur ïaka takma rupa bad 11 ngut kiba khur ïaka takma Rnong.
Ïa kitei ki rang bad thei ïalehkai Muay Thai la pdiang burom mynta ka sngi ha Nongpoh da ka seng MPUF hapoh ka jingïalam jong u Jackson Sohtun President bad ki dkhot ha ryngkat ka jingpynkup burom ïaki haka jingdonlang u Bah Angelus Sun President ka kynhun.
Haba kren ha katei ka sngi naka liang u Bah Jackson Sohtun kum u President ka seng u la pynpaw ka jingsngewkmen kaba khraw ba ki rang bad thei ïalehkai khamtam naka dong Ri-Bhoi kila sdang ban kiew shaphrang ha baroh ki liang bad wanrah ruh ki nam bad burom kaba long ka jingsarong ïaka district bad ka jylla baroh kawei.
U la kyntu ruh ïakitei ki samla ba kin dang minot bad trei shitom shuh shuh ba kin dang kiew shaphrang haka jingim jong ki khamtam haka kam ïalehkai.