Pdiang burom ka KSU ïa ki nongïakhun kti ka jylla ba wan ïashimbynta ha ka Championship ha Moldova

SHILLONG, Nailar 26: Ka KSU CEC ha ka 26 tarik mynta u bnai ha ka jingïalam jong U Samla Hopeful Born L. Mawnai & Samla Eddie Malngiang Asst. Organising Secretary CEC ki la ioh ban pdiang burom ha ISBT Mawiong ïa ki rang bad ki thei ïakhun kti ka jylla (Arwrestling) kiba la wan ban ïashimbynta ha ka World Armwrestling & Para Armwrestling Championship kaba long ha ka Ri Moldova.
Ha kane ka sngi la don ryngkat ban sakhilang da ki dkhot ka KSU na ki circle bapher bapher bad ha ryngkat ka jingdon lang ki bahaïing hasem ki nongïashim bynta.
Lah ban kdew ba ki don baroh 14 ngut na ka jylla kiba la ïoh ban mihkhmat ïa ka ri, kata 2 ngut kiba la shah jied kim ki officials bad 12 ngut ki nongïashim bynta ne ki nongïalehkai.
Na pdeng kine kiba la leit ïashimbynta, kiba lah ioh ban khur ïa ki takma ki long:- ka Margaret Pathaw kaba la jop ar tyllli ki takma, (rupa bad rnong) ha ka kyrdan ïakhun 60kg Master (kti kadiang bad kamon), nangta ka Senebi syngkli kaba la jop ar tylli ki takma rnong ha ka 55kg Youth Girls (kadiang bad kamon), ka Mihsngewbha Rymbai kaba la jop ar tylli ki takma rupa ha ka kyrdan ïakhun 80kg grandmaster (kti kadiang bad kamon), ka Starina Jasaiñ kaba la khur ar tylli ki takma, ba kynthup kawei ka rupa ha ka thup ïakhun kti kadiang bad ka rnong ha ka thup ïakhun kti kamon ha ka kyrdan ïakhun 60kg grand master, u Hubert Paliar, u ba la jop takma rnong ha ka HI Standing Men 60 kg Left Hand.
Ka seng ka kitbok kitwïang ïa baroh ki nongïalehkai ba lyngba kane ka rynsan kin nang lah shuh shuh ban pyntbit kham bha bad ba kin wanrah nam bad burom bïang sa shisien ïa ka jylla bad ïa ka jaidbynriew hi baroh kawei.
Na ka lïang jong i President ka Meghalaya Arm Wrestling Assocïation i lah ai khublei shi katdei ïa ka Seng bad ha ki sngi ki por ban nang wan ki kyrmen ba ngin ïa snoh kti lang khnang ban kyntiew ïa ka sap ka phong ba ki khun samla ka Bri U Hynñiewtrep ki don.