Kmen u Coach Lajong ba lah pynpoi semi final Durand Cup ki samla trai jylla

Shillong, Nailar 26 : U Coach ka Shillong Lajong u Jose Carlos Rodriguez u la pynpaw ia ka jingkmen ba ki samla Meghalaya ki la lah ban pynpoi ia ka Shillong Lajong haduh ka semi final jong ka Durand Cup.
Ka Shillong Lajong watla ka shah rem noh ha ka kynhun ba khlaiñbor jong ka Northeast United FC ha ka semi final, pynban ka la kylla long kawei na ki kynhun kaba la lah ban pynliem ia ki kynhun ba khlaiñbor jong ka Indian Super League da kaba sdang shwa na ka FC Goa bud pat sa ka East Bengal.
U Coach ka Shillong Lajong u la ai ruh ka burom ia ki paidbah nongkyrshan kiba la mih paidbah ban ka jingkyrshan met bad mynsiem ia ka kynhun naduh kaba sdang haduh ka kkylla kaba khatduh jong ka semi final.
Haba bynrap lang, u Coach ka North East United FC u Juan Pedro Ben Ali Hammou u la ong ba ki sngewkmen haduh katta katta ba ka kynhun ka la poi shaduh ka final jong ka Durand Cup.
Halor ka jingkylli ba haduh kattno ka kynhun ka pynkhreh na bynta ka final, une u Coach u la ong, “Kampher lada ngi iakhun bad no bad no ruh ngim salia namar ngi la long kiba la pynkhreh lypa. Naduh kaba sdang hi ngi shim ba ngim ju dei ban kheiñ sting ia ka Liang Pyrshah namar ngim lah ban tip lypa. Kumta ruh ngi iai bteng ia kane ka rukom ialehkai,” u la ong.
Ha kajuh ka por u ai khublei ruh ia ki paidbah nongkyrshan da kaba ong ba ha ka jingiakhun ha kane ka sngi, ki paidbah ki kmen lang lada jop mano mano ruh naba ka Shillong Lajong bad ka North East United ka long kum shi para.