Nongstoiñ, Jymmang 22: Ka election ban jied ïa ki nongmihkhmat sha ka Ïing dorbar Thaw aiñ ka jylla kam slem shuh, ha kaba ki kyrtong jong ki seng saiñ pyrthei bapher bapher ki la sdang ban trei shitom ha kaba lum ïa ki paitbah nongthep vote ban pan ïa ka jingkyrshan na ka bynta ban pynjop ïa ki.
Ha kaba ïadei bad ka jinglumlang ïa ki paitbah nongkyrshan na ka bynta ka election ban wan, ka Hill State People Democratic Party Ri Muliang Zone kaba hap ha ka Rambrai Jyrngam Constituency, ha ka sngi saitjaiñ ka 21 tarik Lber 2022 ka la pynlong ïa ka jingïalang ha ka hall jong ka St John Higher Secondary School Nongkroh, ha kaba la pdiang burom ïa kiba samla, ki rangbah bad ki longkmie kiba dei ki nongïalam jong kiwei pat ki party kiba la wan ban pynïasoh sha ka HSPDP. Kitei ki nongïalam kiba la wan ban pynïasoh ki dei kiba na ki shnong bapher bapher kiba hap ha ka Mawlangsu Zone, Rimuliang Zone, Rambrai Zone bad Nongtrai Zone.
Ha ka jingïalang ba la pynïaid da u bah Richmond Nongsiej Secretary jong ka HSPDP President ka HSPDP Rambrai Circle, la ïadon ryngkat ruh da u bah K.P.Pangñiang President rangbah ka party u ba dei ruh u kyrtong u ban ïakhun ïa ka election ha u snem ban wan. Kiwei pat ki nongïalam jong ka HSPDP Mawthadraishan Constituency, ki nongkitkam jong ka Youth Wing central body, ka kong Evalon Kharbani Kyrtong jong ka Mawhati Constituency, ki sordar shnong, ki riew rangbah bad ki nongkitkam na ki Primary Unit kiba la wan ban pynïasoh sha ka party bad ruh ïa ki nongkyrshan kiba la wan phai biang ban ai ka jingkyrshan ïa ka party.
Ha shuwa ban sdang ïa ka jingïalang la pdiang burom ïa kiba la wan ban pynïasoh sha ka party da u bah K.P Pangñiang, da kaba pyndeng da ka muffler kum ka dak jong ka jingpdiang burom ïa ki. Hadien ka jingpdiang burom, la ïoh ïa ka jingkren na u bah Ombarly Wanñiang, u bah Bony Lyngdoh Lyngkhoi, Bah Kotbor Warjri, Bah Wallyson Sohlang, Kong Evalin Kharbani bad bah Sandondor Ryntathiang President ka Youth Wing central body, kiba ka sur jingkren hi na baroh ka long beit ban trei shitom bad pynkhlain ia ka party, khnang ban lah ban kheit ia ka jingjop bad ban wanrah pat ia ka burom jong ka Party.
U bah Pangñiang haba kren ha katei ka sngi u la ong ba ka jingwan phai biang jong ki nongkyrshan kiba mynshuwa bad ka jingwan rung thymmai jong ki nongkyrshan ka ai mynsiem ïa u ha ka election ban wan, u la pynkynmaw ruh ba ka jylla ka la dap sanphew snem bad ka la donkam ba ki paitbah ki hap ban pyrkhat thymmai. Namar katba nang mih ki snem, ka sorkar ka la nang pynmih ïa ki aiñ kiba ktah haduh katta katta ïa ka Jaitbynriew, khamtam eh ha kaba ïadei bad ka jinglong trai ïa ka khyndew ka shyiap, ki khlaw ki btap, ki marpoh khyndew bad ka daw kaba kongsan ka dei namar ba ym shym pat lah satia ban weng ïa ka paragraph 12 A (b).
U la ong ruh ba ka HSPDP wat la ka ïatreilang bad ka sorkar MDA kaba la lam khmat da ka NPP, hynrei ha kaba ïa dei bad ka jingthmu jong ka sorkar ban pynlong aiñ ïa ka jingïakhalai, ka HSPDP ka pyrshah jur bad kan ym mynjur da lei lei ruh.
