Nongstoiñ, Jymmang, 22: Ka jingpynjulor jong u kynja khñiang ïa ki riewhadem ha u snem ba la dep ka jur bha ha baroh ka West Khasi Hills bad mynta u snem ruh ka long kumjuh. Utei u jait khñiang u sdang ban bam shuwa ïa ki sla nangta u rung ha khmut jong u jyntang bad u bam haduh ki bynta ba shapoh. Ha kaba sdang utei u kñiang u long uba rit bad u nang heh suki suki.
Kumba long ha u snem ba la dep shisien ba la lap ïa ki dak ha ki sla riewhadem wat lada ka jaka rep ka heh katno katno ruh man la u tynrai un ym lait na utei u khñiang. Ha u snem ba la dep, bun ki nongrep ki la pyrshang ban synreit da ka um ba la pdem da u duma sla bad ruh da ka dawai DDT, hynrei kam myntoi satia.
Ka jingbam jong utei u khñiang ïa ki riewhadem ha une u snem ruh kan jur bha, namar haba pyrshang ban leit peit ha ki katto katne ki kper bad ki jaka rep, la lap ba kito ki jaka rep kiba u riewhadem u dang kham rit ka jingbam khñiang ka dang duna. Hynrei ha kito ki kper kiba u la kham heh, ym don shuh wat tang shi tynrai u jingthung u ba lait na ka jing don ki dak bam khñiang bad shisien ba la don ki dak lieh ha ki sla, tang hadien shi sngi ar sngi u khñiang u la rung shapoh bad u jingthung un ym long shuh.
