Nongpoh, Ïaiong 05: Ka long shisha ka jingsarong ïa ka Ri Bhoi District ha kaba hadien ba la pynbna ïa ka result jong ka SSLC examination 2025 da ka Meghalaya Board of School Education (MBOSE), ki don haduh 4 ngut ki samla pule na Ri Bhoi kiba la ioh ban rung sha ka thup jong ka Top-20 na ki saw tylli ki 3 tylli ki skul kiba don ha Ri Bhoi District.
Kum ban pyntip paidbah, ha kane ka Result jong ka SSLC examination 2025, ka Ri Bhoi District ka la poi shaduh ka 89.33% bad kaba kham sngew sarong ka long ba 4 ngut ki samla ki la ioh ban rung ha ka thup jong ka Top-20.
Kine ki samla kiba la rung sha ka thup jong ka top-20 ki kynthup ïa u Sourav Pandey na Alpha English Higher Secondary School, Nongpoh, uba la ioh rung ha ha ka 3rd position jon ka top-20 da kaba u la ioh ban khur ïa ki mark haduh 576 marks, ryngkat ka distinction ha ka subject English, Mathematics, Science & Technology, Social Science, Computer Science, bad Hindi.
Sa kawei pat ka samla na kane ka juh ka skul Alpha English Higher Secondary School ka dei ka samla Nandini Kumari ka la ioh ha ka kyrdan 6th position jong ka top -20 da kaba ka la ioh 569 marks bad ka la ioh khur ruh ïa ka distinction bad letter ha ka subject English, Mathematics, Science & Technology, Social Science, Health & Physical Education, bad ka Hindi. Ka Queency Kharsohnoh na ka Umroi Presbyterian Higher Secondary School, Umroi, ka la ioh rung ha ka 7th Position da kaba ioh khur haduh 568 marks bad ruh ka Samla Ineshabakor Nongrum na Nehru Memorial Secondary School, Umsning, ka la ioh rung ha ka 14th Position da kaba ioh khur 561 marks.
Ha kane ka sngi, ym tang kine ki khynnnah, naduh ki nonghikai bad ki kmie ki kpa haba kren sha ki lad pathai khubor ki la pynpaw ïa ka mynsiem jong ka jingsarong ba ki khun ki la poi shaduh kane ka kyrdan bad kaba kham khraw ka long naduh ki nonghikai bad ki kmie ki kpa ki la ai ka jingkyrkhu ïa kine ki samla kiba la wan rah burom da kaba ki la leh bha shisha ha ka jingpule jong ki.
