Nga la rem bunsien ha ki elekshon ngam da sngew phylla shuh: K.P Pangñiang

Nongstoiñ, Ïaïong 05: “Watla ha ki ar tylli ki Election kata ha ka Election MLA 2023 bad ha ka Election MDC ha une u snem 2025, ki paitbah kim shym la ai shuh ïa ka jingkyrshan ba pura haduh ban da poi sha ka thong jong ka jingjop. Hynrei kum u president jong ka Hills State People Democratic Party, ngan ym sangeh satia ban shakri ïa ki paitbah ha baroh ki bynta ba ki donkam bad ngan ïa don bynta lang” ong u bah K.P.Pangñiang MLA barim ka Rambrai Jyrngam.
Haba ïakren bad u nongthoh khubor u bah Pangñiang u la ong ruh ba um sngew phylla shuh ïa ka jingshah rem bad ka dei ka mon jong u paitbah, namar ha ki snem ba mynshuwa ruh u la ïaleh teng ïa ka Election MDC bad MLA na Mawshynrut constituency haduh arsien arwat, hynrei um shym la jop satia kumta ka jingshah rem jong u ha ki Election ka la long myllen noh.
Nalor kata u la kam ruh ba naduh ba u (L) bah Hopingstone Lyngdoh u dang don ha kane ka pyrthei bad u dang long u president jong ka HSPDP, ha ki sngi ba u la sdang ban shitom u la bthah ïa u ba u dei ban pyndep ïa baroh ki kam kiba ka party kam pat lah ban pyndep, kum ka jingdawa ban pynbeit noh ïa u pud u sam, ban ïai bteng ïa ka jingdawa Khasi Jaiñtia State na ka sorkar India, ban ïeng skhem triang ban ym ailad ban tih ïa u Uranium bad kiwei kiwei ki kam kiba ka party kam shym pat lah ban pyndep.
U bah Pangñiang u la ong ruh ba ha kum kane ka por ba ki paitbah ha ri lum Khasi bad Jaiñtia ki don hapdeng ka jingklumar jingmut, khamtam ka jingshah pynsngewthuh bakla ha kita ki nongïalam kiba kam ba ki ieit jaitbynriew, ka long kaba eh haduh katta katta ban pynsngewthuh ne ban pynshai ha ki ïa ki jingshisha.
Hynrei ma u ryngkat bad ki para nongïalam jong ka party kiba don lang ha ka Central Executive Committee, lem bad ki paitbah nongkyrshan kiba sngewthuh ïa ki nongrim treikam jong ka party kiba dang ïaineh haduh mynta, kin ym shongthait ban pyshai ïa ka jingtreikam bad ka thong ba ki don ban pyndep.
U la ong ruh ba watla kita ki nongïalam paitbah kiba ju pyrta ba ki ieit ïa ka jaitbynriew ki don kyrhai, hynrei ki paitbah ki dei ban kynmaw ba lymda dei ba ka HSPDP lyngba u nongïalam bad da ki spah ngut ki shipai kiba pdiang burom ïa ka Mrs Indira Gandhi da ki lama ïong ha sor Shillong, haduh mynta ka jylla Meghalaya kan ym pat urlong bad wat ha ka kren ka khana ruh lehse ki paitbah ka jylla ki la hap ban pyndonkam da ka ktien Assamese.
U la ong ba wat la ki paitbah ki beiñ ki kynthoh katno katno ruh, hynrei ka HSPDP kam sngewpher namar ki jingshisha ki paw tyngkreiñ lyngba ki jingthoh jingtar, kiba la buh ha ka thup sah jingkynmaw (Souvenir) kaba la dep pyllait ha ka jingrakhe ïa ka jingdap sanphew snem jong ka party, ka la long sakhi kaba shai kdar hakhmat ki riew stad, ki riew shemphang ha ka synshar khaddar, ba ka dei tang HSPDP ka party riewlum kaba la noh ïa u synñiang u ba khraw tam na ka bynta ka jaitbynriew.
Ka jingioh jylla ba pura bad ka party kaba la kynjoh ruh sha ka rynïeng kaba pura kum ka party trai ri kaba la palat sanphew snem haduh mynta. Katba kiwei pat ki party trai ri watla ki don ïa kita ki nongïalam kiba ju pyrta na ka por sha ka por ba ki ieit ïa ka jaitbynriew, hynrei shi por ki mih bad hadien katto katne ki jah noh.
U la pynkynmaw ruh ba All Party Hills Leaders Conference (APHLC) ka dei ka party trai ri kaba nyngkong duh. Ka dei ruh ka APHLC kaba la sdang nyngkong eh ban beh ïa ki para nongïalam na ka party bad ka dei ruh ka raibi kaba hiar haduh kine ki sngi.
U la ong ba ka party ka pdiang sngewbha ïa ki jingai jingmut jong ki riew stad, ki riew shemphang ha ka synshar khaddar, ki riew stad kiba shemphang ïa ki aiñ ki kanun, khnang ka jaitbynriew kan kiew irat ha baroh ki liang.