Pat sdang ka Science bad Commerce stream ha Sohra College haduh mynta ruh, ujor u MDC sha u Myntri

Shillong, Naitung 02 : U MDC bad MLA barim ka Sohra, u ba long ruh u Nongïalam ka Liang Pyrshah ha Khasi Hills Autonomous District Council (KHADC), u Bah Titos W Chyne, u la ujor markhmat sha u Myntri ba khmih ïa ka Tnad Pule Puthi, u Bah Lahkmen Rymbui, da kaba kyrpad ïa ka Sorkar ban shim mardor ïa ki sienjam ban pynbeit ïa ki katto katne ki mat kiba ïadei bad ka Sohra Government College bad kumjuh halor ka Higher Secondary School ha Sohra.
Ha kane ka jingïakynduh, u Bah Titosstar u la pyntip ba ha ka snem pule jong u 2024-2025 ka Sorkar ka la pynbna ba yn plie noh ïa ka Science bad Commerce Stream ha Sohra Government College. “Hynrei wat hadien ka snem pule jong u 2026-2026 bad wat hadien ba la sdang ka snem pule 2026-2027, hynrei kitei ki laiñ pule kim pat treikam satia,” u la ong.
Shuh shuh u la ïathuh ba kane ka jingslem ka la pynsngewduh jingkyrmen ïa bun ki longïing, khamtam ïa kito kiba duna ka ïoh ka kot, kiba ym lah ban pynlut pisa ban phah ïa ki khun jong ki sha Shillong ban bteng ïa ka jingpule ha ki lain Science bad Commerce.
U Bah Titos u la kdew ruh ba ki paidbah ka Sohra ki la angnud slem ban ïohi ïa ka Higher Secondary School na kaba ka don mynta tang ka Arts Stream ba kan don lang noh bad ka Science bad Commerce Stream. U ong ruh ba lada plie lang ïa kine kan long ka jingkyrkhu ïa ki samla pule jong ka thaiñ Sohra bad ki shnong ba marjan ban ïoh ïa ka jingpule kaba kham bha khlem da hap leit jngai na la iing.
Nalor kata, u la pynpaw ruh ïa ka jingsngewkhia halor ka jinglong jingman jong ka ïing kaba dang pyndonkam shipor da ka Higher Secondary School ha ka Normal Training School, kaba la rim bad jot rathai. U la ong ba kane ka jinglong jingman ka buh jingma ïa ka jingshngain jong ki samla pule bad ka pynthut ïa ka jingpule jong ki.
“Kumta la donkam kyrkieh ai ka sorkar ba kan shimkhia ïa kane ka bynta ban ai noh da ka jingtei kaba skhem bad kaba pura na ka bynta ka Higher Secondary School,” u la ong.
Namarkata, u la kyrpad ïa u Myntri ba un tuklar ban pynkloi ïa ka jingplie ïa ki Science bad Commerce Stream ha Sohra Government College kham kloi bad ruh ban shim mardor ïa ki sienjam ban pynbiang ïa ka ïing skul kaba paka bad kaba shngain na ka bynta ka Higher Secondary School.
U Bah Titos u la kyrpad ïa ka Sorkar ba kan shim kham kloi ïa kine ki mat, kiba u ong ba ki dei ki jingsngewkhia jong ki paidbah ka Sohra, khnang ba ki samla pule kin ïoh ïa ka jingnang jingstad kaba kham bha ha la ka jong ka thaiñ.