Shillong, Naiwieng, 27: Ka Ingbishar Meghalaya High Court ha ka sngi Balang ka la hukum ïa ka Shillong Municipal Board (SMB) ban ai jubab ïa kam ba la leh ha kaba ïadei bad ki ksew surok bad ban shim ruh ïa ki lad ki lynti ban buh ïa ka jaka sah na ka bynta jong ki da ka jingkyrshan jong ka Sorkar Jylla.
Ha ka hukum ba la pynmih hadien ba shong bishar ïa ka PIL, ka Bench ba kynthup ïa u Chief Justice u IP Mukerji bad u Justice W.Diengdoh ka la ong, “ngi hukum ban dei ban shim ïa ki lad ki lynti da ka Board da ka jingkyrshan jong ka Sorkar Jylla bad ïa ka kam ba la leh dei ban jubab ha ka kaiphod ba la phah sha kane ka ingbishar ha ka 5 tarik, Rymphang, 2025.”
Ka Iingbishar ka la shimkhia ba ka long kaba shisha ba ki ksew surok ki la nang kharoi bad buh jingman ïa ki paidbah.
Ki case shah dait ksew bad ka jingïap na ka jingpang shah dait ksew ka la kiew bha.
Ka la ong ba u Nongïasaid Aiñ na ka bynta ka Shillong Municipal Board u la pynpaw ba ka Municipal ka la shim ïa ki lad ki lynti ban ai injek tika ïa ki ksew surok ban lait na ka jingsaphriang ka jingpang Rabbies bad ban pynkhuid ïa ki khnang ba ka jingdon jong ki kan ym kiew. Hynrei haduh mynta ym pat don jaka rieh ban ri ïa kine ki ksew.
Ki nongtrei ka Municipal ki kem ïa ki ksew na surok, ki ai injek tika bad ki pynkhuid pynsuba ïa ki. Hadien kata, la pyllait biang ïa ki sha surok.
“Watla ngi ïaroh ïa kane ka kam ba la leh da ka Municipal, hynrei ka long kaba donkam ïa ka Board ban ïoh ïa ka jaka sah kaba lah ban ri ïa kine ki ksew surok,” la ïai ban ka Iingbishar.
Ha kaba ïadei bad ka jingpynkynriah ïa ka Zoo ba mynta na Shillong, ka Bench ka la pynpaw ïa ka jingsngewhun ïa ka kam ba la leh da ka Sorkar Jylla.
“Ngi sngewhun ïa ka kam ba la leh da ka Sorkar Jylla ban pynkynriah ïa ka Zoo sha ka jaka kaba kham heh na ka bynta ki mrad,” ong ka Iingbishar.
U Nongïasaid Aiñ na ka bynta ka Jylla u pynpaw hakhmat ka Ingbishar ba ha u bnai Jylliew, 2024, ïa ka Zoo kaba mynta ha Shillong la pynkynriah sha ka jaka kaba jngai kumba 35 kilomitar na Shillong. Kane ka jaka ka don nalor kiwei pat ka jaka sumar mrad kaba la peit ruh da u doktor uba tbit.
La jan baroh ki mrad na kane ka Zoo kaba mynta lait noh tang kawei ka Skei ba dang armet bad ki sim la pynkynriah noh sha ka jaka thymmai kaba la tip kum ka Meghalaya State Zoo.
Ïa ki sim ym shym la lah ban pynkynriah namar ba la hap ban buh ïa ki ha ka ruh kaba skhem, kaba ka jingtei kam pat dep haduh mynta, la ong ka hukum.
