Pan ka BJP na u Myntri Ïada Ri ïa ki jaka shipai ha Shillong ban khang weng ka dheng kali

Shillong, K’ Lyngkot 30: U MLA ka BJP na South Shillong Contituency bad ki nongïalam ka BJP-Meghalaya ha ka sngi Balang ki la ïakynduh ïa u Myntri ki Kam Ïada Ri u Rajnath Singh ha Nongbah Delhi ban pan ïa ki jaka shipai kiba don ha ka nongbah Shillong khnang ban lah pynduna ïa ka jingdheng kali.
La ong ba kane ka kynhun ka dei kaba la ïalam da u MLA ka BJP Bah Sanbor Shullai, u President ka BJP Meghalaya Rikman G. Momin, u Vice President ka BJP Meghalaya Bernard Marak bad kiwei.
Ha kane ka sngi kane ka kynhun ka la ïatai sani bad u Myntri halor ka jingdonkam ïa ki jaka jong ki shipai kiba hab hapoh ka jingkhmih jong ka Defence Ministry kiba don ha nongbah Shillong, ka ban long ka jingïarap kaba khraw ha ka ban pynduna ïa ka jingdheng kali kaba la jur bha ha kane ka nongbah.
Ki la pynpaw ba ki jaka kiba kynthup ïa ka Lady Keane Road ban mih sha Police Bazar, ka Shillong Peak Road, ka Umpling Bridge Road ban mih sha Chief Engineer Office, Shillong bad ka Footpath hajan ka Anjali Cinema Hall.
Halor kane u Bah Sanbor Shullai ula ong, ba lada ai ïa kitei ki surok ban pyndonkam ha ka ban pynïaid ki kali jong ki paidbah ha ryngkat ka jingdon ïa u pud u sam uba biang bad uba la ker, kan ïarap shibun ha ka ban pynduna ïa ka jingdheng kali.
U Bah Sanbor ula ong ruh ba katto katne ki jaka jong ka tnad Defence kaba don hajan Umsohsun ban mih sha lad Rhino lah ban pyndonkam ha ka ban tei ïa ka jaka pynïeng kali bad kane kan pynduna ïa ka jingdheng kali hajan ka Khyndailad bad ki jaka ba marjan.
U Bah Sanbor ula ong ruh ba ka jaka hajan ka Anjali Cantonment Beat House ka dei kaba lah ban pyndonkam na ka bynta ban pynïeng ïa ki kali bad ka jaka die na ka bynta ki nongdie madan. Lah ban siew ruh ïa katei ka bai jaka da kaba ïaid katkum ka Land Compensation Rules jong ka Defence Ministry.
U MLA ka BJP ula ïathuh ba na ka liang u Myntri ka tnad Defence ula pynthikna ba yn sa khmih bniah bha halor kane ka kam bad na ka liang ka seng BJP ruh kan ïai bteng ban buddien haduh ba kan da urlong kane ka kam.
Kane ka kynhun jong ka BJP ka la pynsngew ruh ïa u Myntri ka Sorkar Pdeng halor ka jingker sainar ïa ka jaka hajan ka Rhino Point da ki bor shipai bad u Myntri ula kular ban shimkhia ban khmih bniah ïa kane bad ula bthah ban aiti ïa ki jingthoh kiba bniah ha kaba ïadei bad ka jingeh kaba mad da ki riewpaidbah.
Na ka liang ka kynhun ka BJP ka la pyntip ba shen kan leit ban ïakynduh ïa u Myntri Rangbah ka jylla ban kyrpad ban thaw ïa ka State Level Committee ka ban khmih na ka bynta ban ïoh ïa ki jaka shipai kiba don ha ka nongbah Shillong.