Ka UCC kam dei ka Agenda ba ka Sorkar MDA kan wanrah ha Meghalaya, ong u Conrad

Shillong, K’ Lyngkot 30: U Myntri Rangbah ka jylla u Conrad K Sangma ha ka sngi Palei u la ong ba kam dei hapoh mat ïakren jong ka sorkar Meghalaya Democratic Alliance (MDA) ban wanrah ïa ka (UCC).
“Kum ka sorkar jylla ngi long kiba shai bha ba ka uniform civil code kam don hapoh ka mat ïakren jong ngi ban wanrah ïa ka UCC. Ngi burom ïa ka jinglong laitluid mane blei jong ka ri bad kumjuh ruh jong ka jylla. Ngi burom ïa ka jingithuh jong ki riewlum bapher bapher kiba don ha ka jylla jong ngi bad ngi long kaba shai bha bad ka jingïada ïa kine ki rukom leh jong ki kynhun bapher bapher dei ban burom,” ong u Sangma sha ki lad pathai khubor.
Haba banjur halor ka jingdonkam ban sngewthuh kaei kaba don baroh hapoh shaphang ka UCC, u Myntri Rangbah u la ong, “Ki don arbynta ha ka, kawei ka dei ka jingmut dalade ba ka uniform civil code, baroh kawei ka jingpyrkhat kaei kata ka uniform civil code bad nangta ka bill ne ka act kaba batai kaei kaba don ha ka uniform bad kaei ka bym dei ka uniform. Kumta ki don artylli ki kam kaba phi dei ban peit. Phim lah ban buh lang hajuh. Balei? Namar ka UCC kum ka jingmut ban pynlong kaba thikna kata ba baroh ka la kylla long ka uniform kam long kaba lah ha India namar sa shisien, ki don ki kynhun riewlum, ki don ruh ki kynhun kiba bun jait, ki kynthun trai ri trai muluk kiba don ki rukom leh bad ki ym lah ban pynïasoh bad kiwei ki kynhun jong kiwei bad ka jingïalong kawei kaba lah ban kwah da ki.”
“Namar kata kane ka jingmut ban pynjari ha baroh ki bynta jong ka jingim bad ha manla ki kynhun bad baroh ban long kawei kam lah ban long namar kam long ruh kaba dei,” u la ong da kaba bynrap ba ka Meghalaya kan kyrshan ïa kane ka bill namar kadei ka ai jait sha ka kmie.