Pyntip u CM ba la ïoh jingbit lai ngut na Meghalaya ban tih dewïong katkum ka juk mynta

0

Shillong, K’Lyngkot 29 : U Myntri Rangbah ka Jylla, Conrad K Sangma ha ka sngi Palei u la pyntip ba ka sorkar pdeng ka la ai jingbit na ka bynta ban sdang noh ïa ka jingtih dewiong ha ka jylla da kaba sdang shwa na ki lai ngut ki trai par dewiong kiba la dep ïoh ïa ka jingbit.
“Mynta ka shong ha kine ki lai ngut ba kin sdang noh ban tih dewiong. Ki lah ban sdang mynta ka miet lane la shai ka shong mynta ha ki,” ong u Myntri Rangbah haba kren bad ki lad pathai khubor.
Halor ka jingkylli, u Myntri Rangbah u la ong ba kane kadei ka mat kaba ki paidbah ki ju kylli man ka por bad kumta naka liang jong ka sorkar ruh ka kwah ban pyntip sha ki paidbah ba kin tip.
“Kumta, mynta ka shong ha kine ki lai ngut kiba la ïoh ïa ka jingbit ban tih dewiong, ym dei kiwei pat, ba kin sdang noh ïa ka kam,” u la bynrap biang.
Da kaba ong ba ki sorkar ba la dep kim shym la lah satia ban ïaid shakhmat haba ïadei bad kane ka kam hadien ba ka jylla ka la shah khang syndon ban tih dewiong, u Myntri Rangbah ula ong ba kane ka mat kadei kaba eh bad kaba kyllain bha hynrei naka liang ka sorkar ka la ïaid shakhmat bad ïakhun ha Supreme Court.
Shuh shuh haba jubab halor ka jingkylli, u Myntri Rangbah u la ong ruh ba um lah satia ban ong ïa mynta katno ka jylla kan ïohnong na ka khajna dewiong hynrei u la shu antad ba lada ka long kum ha ki snem mynshwa lehse ka khajna ka lah ban poi sha ki 500 – 600 klur lane wat shaduh 800 – 900 klur shisnem.
“Ngim pat lah ban ong ba ka lah ban poi haduh katei namar ïa mynta hi ka dang kloi than ïanga ban ong ei ei naba ym pat sdang ka kam.”
Da kaba pyntip ba ïa u dewiong ba la dep tih ki trai par ki lah ban die hi, u Myntri Rangbah u la ïathuh ruh ba kan don ruh ka jingpeitngor halor ka jingsei ïa u dewiong bad ka rung ka mih jongki kali kit dewiong na kitei ki par.
Ha kawei pat ka liang u la ong ki dang don shuh ki trai par dewiong kiba dang aplai ban ïoh jingbit na ka bynta ban ïoh tih dewiong noh. Katkum ka jingïathuh jong u kiba pan thymmai ki don kumba 12 – 15 ngut ei ei.

Leave A Reply

Your email address will not be published.