Shi khung ki tiar siat kurup ki SOT East Garo Hills na ka khlaw Chibilbang

Shillong, K’Lyngkot 29 : Ki pulit Special Operation Team jong ka East Garo Hills ha ka sngi Palei ki la lap shi khung ki tiar siat kiba la buhrieh ha kawei ka khlaw hajan ka shnong Chibilbang kaba hap ha Rongjeng Police Station, ong u SP na katei ka distrik, Bah SA Rynjah.
La ïathuh ba ki pulit hadien ba ki la ïoh ïa ka jingtip kaba bniah, mardor na ka liang ki pulit special operation team ki la pynlong ïa ka jingleit khynra ha ki khlaw jong ka Chibilbang kaba hap ha Rongjeng PS.
Kane ka jingkhynra ka la sdang naduh ka por 10:00 baje mynmiet jong ka 29tarik bad ruh kumba ha ka por 1:00 baje mynstep jong ka 30tarik ha kaba ka kynhun ka la lap shi thup ki tiar siat ba la tep hajan u trai dieng uba heh bha.
La ïathuh ruh ba ïa kitei ki tiar siat la kurup noh hangtei hi ha ryngkat ka jingdonlang ki nongsakhi shimet. Na ka liang u SP u la pyntip ruh ba ka jingtohkit halor kane ka dang ïaid.