Khliehriat, Rymphang, 18: Ka Kong Violet Lyngdoh, kaba ïakhun kyrtong Shimet ïa ka elekshon sha JHADC na Rymbai- Khliehriat Constituency ha ka jingïalang ba la pynlong ha ka shnong Ladrymbai Datsimpeiñ ka la pan ka jingkyrshan na ki paidbah jong ka Ladrymbai Pyllun ba kynthup saw tylli ki shnong ba kin ailad biang ba kan poi sha ka thong kum ka MDC na ka Rymbai Khliehriat Constituency.
Ka la ong ba ha u snem 2014 haduh 2019 ki paidbah ki la pynjop ïa ka kum ka MDC bad ka la lah ban wanrah ïa ki skhim kiba la kot 30 haduh 40 lak tyngka bad mynta ka kynti ruh ka la pan biang ïa ka jingkyrshan ba kan poi biang sha ka thong ban dup lah ban wanrah shuh shuh ïa ka roi ka par ka bha ka miat ha ki shnong ki thaw.
Ka la ong ba ha kito ki por ba ka dang long kum ka MDC ka la la ïohlad ban ïarap ïa ki longiing ki baduk kiba donkam ïa ki jingïarap lyngba ki skhim bad ong ba ki dang don shuh shuh ki longïing ki baduk kiba dang donkam ban ai ki jingïarap ïa ki da ki skim bapher bapher.
Ka Kong Violet Lyngdoh ka la panmap na ki longïing kiba kam pat shym la lah ban ai ki jingïarap ha ka por ba ka dang long kum ka MDC namarba ka skim MDC ka dei ka skhim ka barit bad ka la kular ba lada ka poi sha ka thong kan phaikhmat sha ki ban ai ki jingïarap. Kumta ka la pan ka jingkyrshan na ki paidbah ba kan dup poi sha ka thong ba kan dup lah ban theh shuh shuh ki jingïarap bad ruh ban wanrah ïa ka roi ka kiew ha ki shnong ki thaw.
Ka la pynpaw shuh shuh ruh ba ka don ka jingangnud ban pynbhabriew ïa ka sor Khliehriat ruh kaba dei ka District Headquarter jong ka East Jaiñtia Hills District, ban wanrah ïa ki tnat treikam bapher bapher jong ka JHADC ban pynsuk ïa ki paidbah lada ki don kino kino ki kam kiba ïadei bad ka District Council.
