Pan jingïarap pisa u Myntri ka tnat Bording na ka Sorkar Pdeng ba pyntreikam ïa ka RDSS

Shillong, Naiwieng 12: U Myntri ka tnat bording jong ka sorkar jylla u A.T. Mondal ha ka sngi baar u la pan ka jingïarap pisa na ka bynta ban pyntreikam ïa ka RDSS. Na ka liang jong u ula pynpaw ruh ïa ki kam kiba ïadei bad ka jingpyntreikam jong ka Smart Meter Scheme kaba hab hapoh ka RDSS. U la pyntip ruh sha u Myntri ka sorkar pdeng ba ka jingpyntreikam ïa ka Smart Meter ka la long ha ka dor kaba rem kiba la ktah bha ïa ki jylla jong kane ka thaiñ shatei lammihngi.
Naba ka jingpyntreikam ïa kane ka kam ka la long kaba la rem bha kumta donkam ïa ka sorkar pdeng ba kan pynduna ïa ka dor jong uwei uwei u meter.
Ïa kane na ka liang jong u Mondal u la pynpaw ha ka jingïalang kaba u la shim bynta ha ka conference jong ki Myntri ka tnat Bording ba la pynïaid da u Union Power Minister ha Yashobhoomi (IICC) New Delhi, ban ïasyllok halor ki kam ban pyntreikam ïa ka RDSS, nangta ka Implementation of Rights of Consumer Rules, PM Har Ghar Saurya Yojna, Resource Adequacy, Development of Pumped Storage project bad kiwei kiwei.
Ha kane ka jingïalang la shim bynta ruh da ki CMD jong ka NTPC, NEEPCO, PGCIL bad SJVNL, Secretary Ministry of Power, Secretary MNRE, Chairman CEA bad CMD REC bad kumjuh ruh na ka PFC.
Ha kaba ïadei bad ka Pumped Storage Project ha Meghalaya, na ka liang jong u Mondal u la ïathuh ba ka jylla ka la ïohpdiang ïa ka jingtyrwa ban pyntreikam ïa ki pumped storage project kaba lah ban kit haduh 4800 MW. Naba ka khajna jong kine ki project kan lah ban long kaba heh u la kyrpad ïa u Myntri ka sorkar pdeng ban pyrkhat na ka bynta ka bha ka miat ki nongshong shnong bad kumjuh ruh ban pyllait ei ïa ka jingsam bording ha ka jylla.
Shuh shuh ha kaba ïadei bad ka renewable energy, na ka liang jong u Mondal u la pynpaw ruh ïa kiba bun ki jingdonkam ha kaba ïadei bad ki jingpyntrei ïa ki hydro project kiba rit ha kaba ïa ka DPR la dep ban pyndep bad ba ïa kine ki kam yn lah ban pyntreikam noh mardor.
Hynrei ka jingeh kaba mih ka long na ka jingduna pisa ha ka jylla bad kumta donkam ïa ka MNRE ba kan pyrkhat ban pynsdang biang ïa ka Central Financial Assistance kaba long T. 7.5 klur ne ka MW na ka bynta ban shna ïa ki hydro project kiba rit kiba la pynsangeh ha ki jylla kum ka Meghalaya kiba lah ban ïoh ka jingmyntoi na ki.
Na ka liang jong u Secretary MNRE u la pyntip ba ïa kine ki jingïasyllok khamtam ha kaba ïadei bad kane ka thaiñ shatei lammihngi yn sa ïakren ha ka jingïalang ka ban long ha Shillong ha ka 27th bad 28th tarik jong u Naiwieng, 2024.