Shillong, Lber, 06: Ka tnat Social Welfare jong ka Sorkar Jylla ka la pan jaka na ki Dorbar Shnong kiba don ha kylleng ka jylla khnang ba ka Sorkar Jylla kan dup lah ban tei ïa ki Rehabilitation Centre ban ai jingsumar ïa ki samla kiba la shah teh mraw ha u drok.
U Myntri uba khmih ïa ka tnat Social Welfare Bah Paul Lyngdoh ha ka jingïakren bad ki lad pathai khubor ha ka sngi Balang u la ong, ki Rehabilitation Centre kiba la peit hi da ka Sorkar ïa mynta ki don hynriew tylli bad ki don ruh ki Foundation ba la pynïaid da ki kynhun shimet kiba la kyrshan jingïarap pisa da ka tnat Social Welfare.
U la ïathuh ruh ba ka tnat Social Welfare da ka jingïatreilang bad ka Mawlai Town Dorbar (MTD) kan sa tei ïa ka Rehabilitation Centre ha ka shnong Mawlai ban ai jingsumar ïa ki samla kiba la kut jingmut ban bthat noh ïa u kynjri ba ki la shah teh mraw ha u drok.
“Ngi kyntu ruh ïa kiwei kiwei ki Dorbar Shnong ba kin sngewthuh ïa kane ka jingeh da kaba ki ai jaka ne ai khyndew khnang ba ngin dup lah ban shna noh ïa ki Rehabilitation Centre,” ong u Bah Paul.
“Ha kaba ïadei bad ka sohkhliang kaba kiba bun ki ong ba kam bit ban shna ïa ki Rehabilitation Centre hapoh ki shnong ki thaw, hynrei ki Dorbar Shnong ki dei ban sngewthuh pat ba kine ki jingeh, kim jia tang hapoh ki san ne hynriew tylli ki shnong hynrei ka dei kaba la saphriang ha baroh kawei ka jylla. Ngi donkam bha ïa ki Dorbar Shnong ban ai jingkyrshan ïa ka Sorkar bad ngin dup lah ban ai jingïarap ïa ki samla kiba la ngop ha u drok,” la ong u Myntrt ka tnat Social Welfare.
