Bym ithuh ki Bank ïa ki kot jaka KHADC, thaw komiti ka sorkar ban bishar bniah ïa ka IRA

Shillong, Lber 06 : Ka sorkar jylla ka la rai ban thaw da ka komiti kaban bishar bniah biang ïa ka Indian Registration Act khnang ban pyntikna ba ki naduh ki bank bad kiwei ki jaka treikam kin ithuh bad pdiang ïa ki kot pynskhem jaka puta ba la ai da ki lai tylli ki district council jong ka jylla.
Haba pynbna ïa kane, u Symbud Myntri Rangbah ka Jylla ba dei peit ïa ka District Council Affairs, Bah Prestone Tynsong haba kren bad ki lad pathai khubor hadien ka jingïalang bad ki lai tylli ki district council u la ong ba ba wat hadien ba ka Land Bill jong ka KHADC ka la long aiñ (Act) hynrei ki dang mih katto katne ki jingeh.
“Kumta kum ka sorkar jylla ngi hap ban bud pyrkhing ïa ka Indian Registration Act bad haba ngi bud ïa ka IRA ngi lap ba don ki don ki jingeh hangne. Kumta haba ki paidbah ki leit sha district council ban ïoh ïa ki kot jaka ne NOC ban shim ram lane kiwei kiwei ki jingdonkam na ka liang ki Bank kim ithuh ïa ki kot ba ai da ki ADC,” u la ong.
Shuh shuh u ong ruh ba hadien ba la ïatai bniah, ka jingïalang ka la rai ban don da kawei pat ka komiti ban bishar bniah biang ïa kane ka IRA bad ruh ban pyntikna ba ki kot jaka ba ai da ki lai ADC ki dei ban pdiang beit da ki bor bahalor kynthup ïa ki bank,” ong u Bah Prestone.