Shillong, Lber 6 : U Myntri Rangbah ka Jylla Conrad K Sangma ha ka sngi Balang, ula ong ba ka Sorkar Jylla ka la shim khia bha ïa ki lad ki lynti ban pynthikna ba ki kam dawa pisa jubor jong ka seng Hynniewtrep National Liberation Council (HNLC) ki dei ban kut noh hapoh ka Jylla.
“Ngi la trei shaid shaid bad ngin pynthikna ba kine ki kam (dawa pisa) kin kut lut ploin bad yn ym don napdeng ki nongshong shnong jong ngi ki ban shah ktah na kane” ong u Conrad haba ïakren bad ki nongthoh khubor.
Kane ka jingkynthoh jong u kala mih halor ka jingkiew ka jingsam shithi dawa pisa sha ki Hehspah bad Nongkhaïi bad kumjuh ruh ka jingïohkem ïa u PSO ka HNLC u Storgy Lyngdoh na Shillong.
U Conrad ula ong ba ka Sorkar jong u, kala kren da kaba shai kdar ba kan ym ailad ïa kino kino ki kam beaiñ kum kane ka kam dawa pisa jubor.
“Kumta, haba kane
ka mih ka la wan sha ka jingtip jong ngi, ngi la shong da ka jingïalang ha ki taiew bala leit- Ngan ym batai lut namar ka dei ka jingïalang hapoh ïing-bad ngi la bthah ïa ki Pulit ba kin shim ïa ki sienjam bad leh ïa kaei kaba donkam ban pynthikna ba kum kine ki kam kim dei ban jia” ula ong.
“Dei halor kane, ki Pulit kila leh ïa la ka kamram. Ki la jam shakhmat bad phin sa ïohi ba ki kam dawa pisa kiba ju don ha ki snem bala leit noh, kin sa duna bha bad wat ki briew ruh kin sa ïathuh ha phi. Hooid, ki don shibun ki kam ba hap leh bad ka jingtrei ka la ïaid shaid shaid” ula bynrap.
Hato kane ka kam dawa pisa ka pynpaw ba ka HNLC kam don jingmut hok ïa ka jingïakren ïasuk, u Myntri Rangbah ula ong “Khlem pep, ngi la kren da kaba shai sha ka HNLC ha kiba bun ki jingïakren lyngba u ksiang jong ngi ba lada ki mut hok shisha ïa ka jingïakren, baroh kine ki kam dawa pisa ki dei ban sangeh noh”.
Haba phai pat sha ka jingpyrshang thaw kynhun biang ïa ka GNLA ha Garo Hills, u Myntri Rangbah ula ong ba lai ngut ki briew kila shah kem bad ki Pulit ki dang wad mynta sa ïa lai ngut, ïa kaba la thikna ba kin sa ïoh kem ïa ki.
Nalor kane, u Myntri Rangbah ula kam ba ka jinglong jingman ka suk ka saiñ hapoh ka Jylla ka long kaba jai jai bha. “Ki jingjia hangne hangtai kin don beit ym lah len ïa kata hynrei ngi la lah pat ban tehlakam ïa ka shongsuk shongsaiñ” ula ong.
