Dei kane ka sorkar ba ai bor ha ki District Council ïa ka building byelaws : CEM KHADC

Shillong, Lber 06 : U CEM ka KHADC, Bah Pynïaid Sing Syiem ha ka sngi Balang u la ong ba ka jingïakhih pyrshah ïa ka MUDA ban pyntreikam ïa ka building byelaws ha u snem 2015 hapoh ka jingïalam jong u President ba mynta ka VPP ka khlem seisoh satia.
Hynrei u la ong pat ba dei kane ka sorkar ba mynta ba la aibor ha ki District Council (KHADC) ban pyntreikam ïa ka aiñ shna ïing ha u pud u sam jong ka Council.
Haba kren bad ki lad pathai khubor hadien ka jingïalang jong baroh lai tylli ki District Council ka jylla bad u Symbud Myntri Rangbah ka jylla, Bah Prestone Tynsong, u CEM u la ong, “Ka jingïakhih pyrshah MUDA ha u snem 2015 ba la ïalam da u President ba mynta ka VPP kaba ha kato ka por dei ka sorkar u Dr. Mukul kum u Myntri Rangbah, ngi ruh ngi la don bynta ban ïakhih ba ym dei ka MUDA kaban pyntreikam ïa kane ka building byelaws hapoh sor bad khapsor.” Shuh shuh u ong ruh ba ka jingïakhih jong u paidbah ha kato ka por kadei beit na ka jingheh palat ka dor ba ki hap siew ban ïoh ïa ka jingbit ban shna iing shna sem.
“Hynrei ngi ïohi pat ba kato ka jingïakhih kam poi shaei sahei hynrei dei tad ynda la wan kane ka sorkar MDA ba mynta ha u 2018 haba kut jong u snem ba la pyndam noh ïa ka building byelaws jong ka MUDA ha u 2015 bad la pynmih thymmai pat ba ka KHADC kan dei kawei na ki bor ban pyntreikam ïa ka,” u la bynrap biang.
Nalorkata, u ong ba naduh ba pyntreikam ka KHADC, kam don shuh ka jingsiew kaba heh hynrei kadei tang katto katne bad ka la ïapher bun bha bad ka dor ba ka sorkar ba mynshwa ka phah siew sha ki paidbah.
U CEM u ong ruh ba nalor ka jingsiew kaba duna, kawei pat ka long ban pyntikna ba ki paidbah kin ïoh ïa ki iing kiba skhem khamtam naba kane ka jaka kadei ka lynti ïaid jong u jumai.
Shwa kane, u Symbud Myntri Rangbah, Bah Prestone Tynsong u la pyntip ba ha ka jingïalang, ka la don ka jingtyrwa na ki District Council ban pyntreikam noh ïa ka building byelaws wat ha ki nongkyndong ruh na ka bynta ka jingshngaiñ bad jingskhem jong ki iing ki sem.
U la ïathuh ruh ba ka jingpyntreikam ïa ka byelaws hapoh ki jaka jong ka Municipal, ha ki ophis sorkar, ha ki hospital bad ki hotel ba heh ba heh la aiti ha ka MUDA ba kan ai jingbit. “Hynrei shabar jong ka Municipal la aiti ha ka District Council la ki jong ki jong ba kin leh,” u la ong.
Shuh shuh u la ïathuh ba ha ka jingïakren ka la mih ruh ka jingpynpaw na ki District Council ban pyntreikam lang noh ïa ka byelaws wat sha ki nongkyndong ruh khamtam haba ka Meghalaya kadei ka jaka ba jur bha u jumai, khnang ba ka jingtei ïa ki iing ki sem kan long kaba skhem ba shngaiñ.
“Kumta ha kaba khatduh ngi la ïa kren bad rai ban thaw ïa ka komiti kaban khlieh da u Secretary ka tnad Urban Affairs bad ki dkhot kin kynthup na ki lai tylli ki district council ryngkat ki tnad kiba donkam,” u la bynrap shuh shuh.