Shillong, Nailar 8 : Ka Synjuk ki Dorbar Shnong Shangpung mynta ka sngi ka la ai ïa ka dorkhast ha u Myntri Rangbah ka jylla u Conrad K Sangma ha ka prokram CM Connect ha kaba ka la kyntu ban ai Civil Sub Division noh ïa ka Shangpung namar ka dei kawei na ki shnong kiba la rim tam hapoh ka Jaintia Hills.
Ha ka memorandum ba la ai sha u Myntri Rangbah ka jylla mynta ka sngi ha ka shnong Shangpung ba la soi da u President ka Synjuk u ma Nidayoo Papang la pynpaw ba ka Synjuk ka la shim ïa kane ka rai hadien ba la ka la shong pyrkhat sani bha la bun bun snem mynta ba ka donkam ban don noh ka Civil Sub Division ha ka shnong Shangpung. ïa kane ka rai ban pynpaw hakhmat ka sorkar la shim ha ka 29 tarik Naitung 2024 halor kiba bun ki nongrim.
Ka shnong Shangpung ka dei kawei na ki shnong ba la rim tam ha ri lum Jaintia kaba la don naduh ka spah snem ba 14. Kane ka shnong ka la long kum ka jaka pule puthi, ka jaka ban sumar, khaïi pateng bad ter ter naduh ki por mynba rim. Ki briew naduh ki jaka bapher bapher ka Jaintia Hills bad wat naduh Karbi Anglong, Assam ki ju sngewtynnad bha ïa ka shnong Shangpung ban long kum ka jaka pdeng jongki. Hynrei wat la katta ruh haduh kine ki sngi ba mynta ka shnong Shangpung ka dang mad ïa kiba bun ki jingeh naduh ka pule puthi, ka koit ka khiah bad jingduk jingkyrduh ruh.
Ki nongshong shnong jongka Shangpung bad ki shnong ba marjan ki dang im ha ka rep ka riang bad kumba 80 % ki dei kiba dang shaniah beit ha ka rep ka riang. Hynrei namar ki jingmih na ka rep ka riang pat ki duna kumta kane ka la nang jur ka jingduk jingkyrduh jong ki briew. Kumta da ka jingthrang ban kyntiew ia ka shnong Shangpung bad ki thaiñ jongka ha ka liang ka roi ka par, ka ïoh ka kot bad khamtam ban rat dyngkong ïa ka jingduk jingkyrduh, ka Synjuk ka buh ka jingkyrpad hakhmat ka sorkar ban ai noh ïa ka Civil Sub Division ha ka shnong Shangpung. Ka Synjuk ka pynpaw ruh ba ka jaka ka la don lypa na ka bynta ban shna ïa ka ophis jongka Civil Sub Division. Ka jingïoh ïa ka Civil Sub Division kan ïarap ïa ki paidbah ruh ban kham jan sha ka sorkar bad kan nang kyntiew ruh ïa ka roi ka par.
Kumta halor kine ki nongrim ka Synjuk ka buh ka jingkyrpad hakhmat U Myntri Rangbah ban ai ïa ka Civil Sub Division ha ka shnong Shangpung.
