Palat T.20 lak shisngi duh khajna ka sorkar ba khang shalan maw sha Bangladesh naduh ki khyndiat sngi

Shillong, Nailar 8 : Hadien ba la mih ka jingïakhih haka Ri Bangladesh, khamtam ha ka Nongbah Dhaka, haduh ba ka myntri rangbah duh jong kane ka Ri ka Sheikh Hasina ka la hiar shuki noh bad khyllem syndon ka sorkar jongka kaba la jia haka 5 tarik mynta u Nailar 2024, kala ktah shibun ïa khaïi pateng ym tang haka Ri Bangladesh, hynrei wat haka jylla Meghalaya ruh, ha kane ka Ri India, namar ka khaïi pateng hadpeng kine ki ar Ri ka thnem bha.
Ki ar tylli ki mar kiba ju bha ka jingshalan na kane ka jylla sha Bangladesh ki dei u Mawshun bad u Mawthup, ha kaba kumba 600 tylli ki trok man la ka sngi ki hiar sha Ri Bangladesh ban pynpoi ïa kine ki mar, ki khyrdop kiba don haki khappud bad ka Bangladesh. Hynrei kumba ka long mynta, namar ba la pynsangeh shuwa ïa ka jingshalan mar ba don ka jinghuri hura, da ki spah tylli ki trok ki ïeng sah miet haki rud surok. Kane ka jingkhang shipor ïa kane ka jingshalan mar sha Bangladesh, ka la ktah shibun naduh ïa ki trai par maw, ki nongshalan mar, kumjuh ïa ki nongtrei kiba trei ha ki par maw bad khamtam ïa ki nongñiah trok kiba hap ban sah ha ki trok miet la bad sngi.
Haba phai sha ka pla tyngka jong sorkar jylla ruh, ka don ka jingduh nong kaba khraw ha kaba lum khajna, ha kaba ym duna ïa ka 20 lak tyngka haka sngi ka jingduh lum khajna lyngba ki Challan. Ïa kitei ki jingshisha baroh la pynpaw da uwei na ki dkhot jong ka War Jaintia Limestone, Boulder Stone Exporters and Miners Association, u Bah Michael Myrchiang.