Shillong, Nailar 8 : Ka sorkar jylla hapoh ka jingïalam ka MDA bad khlieh da u Myntri Rangbah ka jylla u Conrad K Sangma myn ha ka Sngi Balang ka la pynbna sa kawei ka prokram ba kyrpang na ka bynta ki nongrep kata ban pynkhlaiñ shuh shuh ïa ka rep ka riang da ki symbai jingthung kiba kongsan bad kiba jur ka jingdawa ha ki ïew ki hat.
Lyngba kane ka prokram kaba la tip kum ka CM Farm+ ka jingpyrshang ka long ban ïarap ïa ki nongrep ha ka jylla da ki symbai jingthung kiba kongsan kumjuh ruh bad ka pisa ba kin pyndonkam ha ka rep ka riang. Kine ki jingtung ki long kum u sohmarit, ki dieng siasia, sohtrun, cashew,u coffee, cocoa bad kiwei kiwei.Ka CM Farm+ ka dei ka prokram kaba kyrpang ba la sdang thymmai da ka sorkar ban kyntiew ïa ka ïoh ka kot bad ka jingkiew jong ki nongrep ha ka spah ka phew hapoh ka jylla na ka jingpynïaid ïew ïa kine ki jingthung ba ki thung bad rep.
Ha kaba sdang jong une u bnai kumba 10 matric ton u sohtrun na ri lum Garo la lah ban die ha ka Meghalaya Pineapple Festival kaba ar kaba la long ha nongbah Delhi. Ha ka sien ba nyngkong ba la pynlong ïa kane ka ka tamasa die sohtrun ha nongbah Delhi ha u snem ba la dep la ïohi ba ka don ka jingkiew dor naduh 50 haduh 100%. Kumba 4 matric ton u Sohniamtra la lah ban die ha ka Zest Fest kaba la long ha u snem ba la dep ha Bangaluru. Kine baroh ki jingjop ki dei lyngba ka Mission Mode jongka sorkar jylla ha ka ban kyntiew ïa ka rep ka riang bad ban pynïaid ïew ïa ki jingmih na ka rep ka riang kiba long naduh u shynrai Lakadong, u Kew, Sohtrun, Sohniamtra, Sying, Tit, Sohphan, kait bad kiwei kiwei.Lyngba kine ki projek ki nongrep ki ïoh jingïarap ha kiba bun ki bynta naduh ki tiar rep, ka pisa haduh kumno ban pynïaid ïew ïa ki jingmih na ka rep ka riang. Ha u snem ba la dep kumba 700 matrict ton ki jingmih na ka rep ka riang napoh ka jylla Meghalaya la shalan sha kiwei ki jylla bad wat shaduh bar ri ruh kum sha Europe, Middle East ba kane ka la wanrah ka jingïoh nong kaba haduh 70 % ïa ki nongrep.
Lyngba kine ki projek kyntiew ïa ka rep ka riang ki don haduh 1.5 lak ki long ïing kiba im ha ka rep ka riang ki la ïoh jingmyntoi. Kiwei kiwei ki Mission ba thymmai hapoh ka jylla kum ka State Organic Mission yn mang kumba 1 lak hectre ka jaka ban rep khlem sboh dawai. Nalor kane ka rep syntiew ne ka floriculture Mission ruh la pyntreikam da ka jingthmu ban kyntiew ïa ka jingrep syntiew hapoh ka jylla khamtam ki syntiew kiba kham niar bad kham kyrpang kiba ym kham don ha kiwei kiwei ki jaka.
Ban pynkhlaiñ shuh shuh ïa ka rep ka riang bad ki jingmih na ka rep ka riang ban nang kyrshan shuh shuh ïa ki nongrep ka sorkar jylla ka la thaw ruh ïa ki Agro-Processng Unit kaba la tip kum ka PRIME Hubs. Kine ki hub ki dei kiba la shna bha ban buh ïa ki mar rep ba kin ym pyut tad haduh ban da die ïa ki. Ki don palat 25,000 ki nongrep bad ki nongsengkam kiba la ïoh jingmyntoi na ki 11 tylli ki PRIME Hub. Mynta ka jingtrei ka dang ïaid ban shna sa 22 tylli ki PRIME Hub.
ïa kine ki projek la pynwan dur bha da ka sorkar hadien ba la bishar bniah ïa ka jinglong jingman ka mariang ha kaba ïadei bad ka rep ka riang hapoh ka jylla. Ki nongrep ha ka jylla Meghalaya ki don ki jaka rep jaka riang ki bym da heh than bad ban pynneh pynsah ïa ka um ruh ka kham jynjar namar ka jinglong lum long them ka jylla bad ka buh ha ka jingeh kaba khraw ban rep ïa u khaw bad u kew ruh. Ka jinglong ka mariang ha kane ka jylla ka kham biang shit ruh em bad khriat ruh em bad ka mariang ruh kaba biang ban rep bha ïa ki soh ki pai, ki syntiew bad ki jingthung kum ki sohmarit, shynrai bad kiwei kiwei.
Lyngba ka CM Farm + ka thong ka long ban pyndonkam hok ïa ka jinglong ka mariang bad ka khyndew ha kane ka jylla khnang ba ka jingim jong ki nongrep ruh kan kylla bad kiew. Lyngba ka CM Farm + ki nongrep kin ïoh jingïarap naduh ki tiar rep, ki symbai, ka sboh, ka dawai khniang . Shwa ban ai yn hikai pyntbit ruh ïa ki nongrep kumno ba kin pyndonkam ïa ki kor rep kiba long kat kum kane ka jyk ba mynta. nalor kata ka sorkar kan ïarap pisa tyngka ruh ïaki nognrep ba kin nang pynïar shuh shuh ïa ka rep ka riang jongki da ki jingthung bapher bapher.
Ha kane ka mang tyngka ba mynta u snem u Myntri Rangbah u la buh thong ban pynkylla ïa ka Meghalaya kum kata ka 10 billion US dollar economy kat haduh u 2028. Kane ka thong ka long ban pynïoh nong arshah ïa ki nongrep ha ka jylla lyngba ki rukom rep bapher bapher da ki symbai kiba wanrah ki jingïoh nong bun shah ïa ki. Kane ka CM Farm+ ruh kan wanrah ka jingkylla dur hapoh ka jylla ïa ki nogrep bad kane ka dei ka jingïohi jngai bad ïthuh lypa jong u Myntri Rangbah ka jylla na ka bynta ka lawei ki nongrep.
