Nongpoh, Nailar 08: U Myntri Rangbah ka jylla mynta ka sngi u la leit ban kynduh bad ban ai mynsiem ïa ki samla kiba la shah hikai ban seng kam lajong bad ban ieng ha la ki jong ki kjat ha kawei ka jaka ai jinghikai kaba la tip kum ka Greta Solutions Training Academy kaba la bei pisa da ka sorkar lyngba ka Meghalaya State Skill Development Society (MSSDS) kaba don haka shnong Mawdiangum.
Kitei ki samla ki la pyndep ki jingshah hikai haka liang kumno ban shet jingshet, ban pynwandur ïa ki riam, jinghikai computer, jingshna na u siej bad kiwei kiwei ba la ai jinghikai da ka Greta Solutions bad Auxilium Skills Training Centre bad kum ki samla ki la pynpaw ka jingsngewkmen kaba khraw hakhmat u Myntri Rangbah bad kwah ruh ban dang pynjanai shuh shuh namar katei ka prokram ka dei kaba lyngkot eh bad ki dang donkam shibun ki jingpynjanai haka jingshah hikai.
Na ka liang kitei ki samla kiba don kumba 65 ngut ki la ïoh ruh ban kren markhmat bad u Myntri Rangbah ka jylla halor ka jingeh bad ka jingsngew jong ki haka jingïaid lynti jong katei ka prokram ai jinghikai ha kaba ki la pynpaw ba kane ka dei ka kabu ïa ki ba kin lah ban ieng ha la ki jong ki kjat.
Ha katei ka sngi la sakhi ruh da ka jingdonlang u Bah Mayral born Syiem MLA ka Nongpoh bad kiwei kiwei ki ophisar sorkar.
U Myntri Rangbah ka jylla u Conrad K Sangma haba kren ha katei ka sngi u la ong ba ka sorkar mynta ka plielad ïa ki samla ba kin ieng haka ki jong ki kjat bad kane ka dei kabu ha kum kane ka juk kyrduh kam katba ki ri ka pyrthei ki donkam ïa ki samla kiba la nang bad pyndep ïa ki jinghikai bapher bapher.
U la ong ruh ba ka sorkar jylla dang shen ka la phah ïa ki nurse ban leit trei sha ka ri Japan bad ka long ka jingkyrkhu ïa ki samla ka jylla kiba la poi sha katei ka ri nalor ka jingsiew kaba heh kaba ki lah ban pyndap pynbiang ïa ka jingdonkam.
Kumta na ka liang u Conrad K Sangma u la kyntu ïa kitei ki samla ban pyndonkam hok ïa ka sap kaba ki don ryngkat ka jingkyrshan lang jong ka sorkar bad khmih lynti ba katei ka prokram kan long ka jingkyrkhu ïa ki samla bad lehse lyngba ka jingshimkhia jong ka sorkar ban ïasoi soskular bad ki kompani bapher bapher kitei ki samla kin ïoh ka lad wat ban trei shabar.
