Pan bor pahara u P.S Shukla na Sorkar Pdeng shwa ban leit shimti biang ïa ka kam ha NEHU

Shillong, Naiwieng 28: Hapdeng ka jingïakhih kaba jur na baroh ki liang pyrshah ïa ka jingwan phai biang jong u, u Vice Chancellor ba mynta jong ka North Eastern Hill University (NEHU) u Prof Prabha Shankar Shukla u la pan ki bor pahara napoh ka sorkar pdeng na ka bynta jong u ban wan sdang biang ïa ka kamram ha ka 2 tarik u Nohprah.
Ha ka shithi ba u la aiti sha u Principal Secretary in-charge Higher Education, Govt of India, u Prof Shukla u la ong, “Ka shuti jong nga kan kut ha ka 29.11.2024, bad ngan sdang biang ïa ka kamram ha NEHU naduh ka 02.12.2024.”
U la kynnoh, “Kane ka la long ba ki la don katto katne ki runar kiba dei na kibun ki seng jong ka skulbah,
lyngba u in charge vice chancellor, da kaba beaiñ ki la pynïaid ïa ki kam hapoh ka campus, bad ki pynmih ïa ki hukum bad ki circular khlem da ïohbor.”
“Halor kine ki jinglong jingman hapoh ka NEHU campus, nga kyrpad ban pynbiang ïa ki lad pahara bad ki bor ai jingïada napoh ka sorkar pdeng, naba ki bor ïada bad pahara ba la pynbiang da ka sorkar jylla ki long kiba duna. Kane ka jingpynbiang ïa ki bor ka jingïada ym tang ba kan ïada ïa nga hynrei kan ïarap ruh ban ïada ïa baroh kawei ka NEHU campus bad ki nongtrei jong ka,” ong u VC ha ka shithi.
U la pyntip ruh ba u la aiti ïa baroh 4 tylli ki jubab ba la pan da ka Ministry of Education ha ka 23.11.2024.
Haba ai ka kaiphod kaba lyngkot halor kane ka jingjia, u Prof Shukla u la ong, “Ka NEHU Students’ Union (NEHUSU), ba la kyrshan da ka seng ki nonghikai ka NEHU Teachers’ Association (NEHUTA) ba la khlieh da u Prof. Lakhon Kma ka la wanrah ka jingkulmar hapoh ka campus naduh ka 25 tarik u bnai Risaw 2024.”
U la kynnoh ba ka NEHUTA ka la ïa hylla bad pyrta pyrshah tang hapdeng ki kynta ha shwa ban sdang ka 113th meeting jong ka Academic Council ha ka 25 tarik u Risaw 2024, ha kaba kim shym la shah ban pynlong ïa ka jingïalang jong ka Academic Council.
“Hadien kane ki la rung jubor hapoh ka office jong u Registrar bad Dy Registrar bad ki la shoh bad khang tala ïa ki ophis treikam jong ki. Ki la rung ruh da ka bor hapoh ka ophis u VC, ki la byrngem ïa nga da ka jingdawa ba dei ban pyndam noh ïa ka jingthung kam ïa u Registrar bad Dy. Registrar. Ym don kawei ruh ka kynhun kaba la ai ïa nga ka representation ne ka jingujor lyngba ka jingthoh halor ki daw ba donkam ban weng ïa baroh arngut ki ophisar,” u la kynnoh.
“Watla katta ruh nga ka pyrshang ban batai ïa ki kam ba dei ban ïaid katkum ka jingpynbeit sha ki bad ban pynthikna ïa ki ba ngan sa sdang ban shim kam mardor ban pynbeit ïa kane ka kam bad ban pynduna ne pynsangeh noh ïa kane ka jinglong jingman. Katkum ka jingdawa jong ki, nga la thung ïa ki Pro-VC, bad ban pan ruh ka jingmynjur napoh ka EC ha kaba kane ka long ruh katkum ki kyndon hapoh ka NEHU Act 1973,” ong u Prof Shukla da kaba bynrap, “Wat hapdeng ki jingpyrshang babha jong nga ban ïakynduh bad ïasyllok bad ban shim ïa ka rai, ka NEHUSU bad ka NEHUTA ki la nang aiding ïa kane ka jingïakhih, ki la pynlong ïa ka jingshong ‘Dharana’ ha ka rukom jong ka jingshong shah thngan hakhmat ka ophis VC, bad ki la khang khyrdep ruh ïa baroh ki khyrdop jong ka University. Ki khlem ai ruh kano kano ka jingpynbna kaba wan lyngba ka jingthoh shaphang kane ka jingïakhih shong shah thngan. Nga la pyntip ruh ïa ki bor pynïaid distrik kaba kynthup ïa ka DC bad SP, ha ryngkat bad ka DGP bad u Chief Secretary jong ka jylla ban pan jingïarap na ki ban pynthikna ba kan don ka jingïada hapoh ka NEHU campus.”
“Wat hapdeng kine, kine ki artylli ki seng ne Association ki la ktah kti ïa nga bad ki la byrngem ïa nga da kaba pynjulor ïa ka jaka sah jong nga. Kumta na kine ki jinglong jingman ba la batai bad ka jingkular ba la pynmih da kine ki artylli ki Association, ki kam ki jam hapoh ka NEHU ki la sangeh haduh kine ki sngi. Ïa ki nongtrei ka University la pynsangeh ba kin pyndep ïa ki kamram jong ki bad ki la sngew ba kim don jingshngaiñ hapoh ka,” u la bynrap.
Katkum ka jingong jong u, ka la don tang da ka jingsngewtieng bad ki jingkulmar kaba la ktah ïa ki rukom treikam jong kane ka jaka pule.
Lah ban pynkynmaw ba ka NEHUSU, NEHUTA, NEHUNSA bad ka KSU ki la dawa ba dei ban weng mardor ïa u VC bad ki la pynpaw ruh ïa kane hakhmat jong ka komit ba arngut ki dkhot ba la thung da ka Ministry of Education ba kim lah satia ban pdiang ïa u Prof Shukla ba un dang wanphai biang kum u VC hapoh ka skulbah NEHU.