Khlem jingmab wat ïa ki jaka kyntang, prong tung ki runar ha Iingmane Unitarian, Laban

Shillong, Naiwieng, 28: Ki runar bym lah ban tip ha ka step sngi palei ki la prong tung hapoh ka Iingmane Unitarian kaba don ha Laban, Shillong ha kaba ki la rong tuh ar tylli ki Chalice rnong ba pynieng mombati ïa kiba ju pyndonkam ha ki jinglehniam, saw tylli ki khiew syntiew ba la rim bha. Ym tang katta ki runar ki la rong tuh ruh ïa kawei ka Chalice na ka Ingmane barim kaba don mar syndah bad ka Iingmane ba thymmai.
Ka jingprong tuh jong ki runar ka la jia tang hadien ar sng ka la don ka jingprong tuh jong ki runar ha Grotto Chapel kaba don hapoh jong ka Iingmane Bah Cathedral Laitumkhrah ha ka sngi Baar mynta ka taiew.
U Chairman jong ka Balang Unitarian Laban Bah LMB Rani ha ka jingïakren bad ki lad pathai khubor u la ïathuh ba kane ka jingprong tuh jong ki runar hapoh ka Iingmane la antad ba ka la jia ha ka por kumba 3-4 baje mynstep.
Ha kaba ïadei bad kane ka jingjia, ki bor pynïaid jong ka Balang Unitarian ki la pyntip mar mar ïa kane ka jingjia sha ki Pulit jong ka Laban Police Station bad ujor ruh da ka ejahar khnang ba Pulit kin pynlong ïa ka jingtohkit bad ka jingbuddien ban lap ksai ïa ki runar kiba donkti ha kane ka kam runar.
U la ïathuh ba ki runar ki la lied ruh ïa ka duli bad ka synduk lum synniang pisa.
“Ban prong tuh kat ha Iingmane bad ban rah ïa ki tiar kiba kyntang ka ktah haduh katta katta. Ngi ladep pyntip sha ki Pulit bad ki la pynlong ïa ka jingtohkit. Ka jingshah tuh kam jia tang hangne hynrei ngi la ïoh jingtip ruh ba ka la don ka jingshah tuh wat ha kiwei kiwei pat ki Iingmane,” u la ong.
“Kane ka jingtuh jingthiem mynta ka la shyrkhei bad ngim lah sngewthuh thuh kaei ka daw ba kan jia haduh katne. Ha ki snem kiba mynshwa ym ju kham bna watla ki don ki jingshah tuh ha ki ing jong ki briew hynrei ban tuh na ka Ingmane ka long kaei kaei kaba pynsngewsih,” u la bynrap.
U Secretary Balang u Bah Pliebok Mylliemngap u la ong, “ngim poi pyrkhat ba ki Iingmane mynta kin kylla sohpdung ha ki nonglute,” u la kren diaw.
U la pynpaw ba ka jingjyllei jong u drok na ka jingngop jong ki khynnah ban dih drok kim salia shuh ban thom ïa ka sang wat ban prong tuh na Iingmane.
U Rangbah Shnong jong ka Raid Laban u Bah Iuster Sun u la pynpaw ka jingsngewsih ba kum kine ki jingjia ki la wan jia hapoh kane ka Iingmane bad ïathuh ruh ba ka Dorbar Shnong ka la shimkhia bha ïa kane ka jingjia ha kaba yn sa shong pyrkhat kumno ban leh nangne shakhmat.
Dang ha ka sngi Baar mynta ka taiew, arngut ki runar bym lah ban ithuh durkhmat ki la prong tuh ha ka Grotto Chapel kaba don hapoh jong ka Iingmane Bah Cathedral Laitumkhrah ha ka por kumba 2:35 baje mynstep da kaba rung na ka jingkhang kaba don na ka liang ka diang.
Lyngba ka CCTV camera ba la pyndait hajan ka Grotto Chapel, la sakhi ba kine ki nonglute ki la khynra naphang hapoh ka Iingmane jin haduh shi kynta shiteng da kaba khynra ïa ki jaka buh tiar ha Sacristy bad pynpait ar tylli ki duli bad rong tuh ïa ka Laptop, katno katno ka pisa na ki ar tylli ki synduk synniang pisa.