Shillong, Naiwieng, 28: Ka jingïakhih shah thngan ba khlem pud sngi jong ki samla pule doktor ka North Eastern Institute of Ayurveda & Homeopathy (NEIAH) Medical College Mawdiangdiang, New Shillong kiba dang pule mynta ïa ka Post Graduate (PG) ka la kynjoh sha ka sngi kaba lai hadien ba kim shym la ïoh ïa ka ‘stipend’ kaba la 10 bnai kynthih.
Ka jingbym ïoh “stipend” ka la pynlong ïa ki samla pule ban ïakynduh jingeh ha kaba pynbit pynbiang ïa ki jingdonkam kiba manla ka sngi.
Ïa ki phra ngut ki samla pule Post Graduate kiba pynlong ka jingïakhih la ai jingkyrshan lang da ki samla pule Undergraduate jong ka College bad ki dkhot jong ka KSU NEIAH Unit.
Ki samla pule ki la pyrta da ki sur ba pynrem ïa ki bor pynïaid halor ka jingleh kuman ïa ka hok jong ki samla pule Post Graduate bad ong ba ka jingleh kuman ka dei ka kam thok kam shukor.
Ka phyllaw jong ka NEIAH ka la shlei da ki samla pule jong ka Medical College da kaba pep ruh ban leit shong klas ban ai jingkyrshan ïa ka jingdawa jong ki samla pule Post Graduate.
La sakhi ba ki samla pule kiba pynlong ïa ka jingïakhih shah thngan ki la kem tlot bad shah pyndait da ka dawai drip ha ka jaka shah thngan.
Kawei na ki samla pule Post Graduate haba ai jingkren sha ki para samla ka la ïathuh ba watla kin sangeh noh ka jingïakhih shah thngan hynrei kin dang ïai bteng ban pynlong ïa ka jingïakhih tad haduh ban da ïoh ïa ka hok kaba ki dei ban ïoh.
Ka la ïathuh ruh ba kane ka Medical College haduh mynta kam pat pynïasoh bad kano kano ka University na ka bynta ka kyrdan pule Post Graduate.
“Ha ka Prospectus bad ha ki Form ki (bor pynïaid ka NEIAH) kam ba ki la pynïasoh bad skulbah NEHU hynrei kam don satai ka jingpynshisha ne ka jingthoh kaba ki lah ban pyni paidbah ïa kata ka jingkam jong ki,” ka la ong.
“Kaba pynsngew khia ïa ngi ka long ba ka jingpule khlem ka Degree ka bym pynïasoh ne ithuh da kano kano ka University ka long thik kumba ki shukor ïa ngi,” la ong kane ka samla bad ïathuh ba kane ka la jia mynta la shi snem kynthih.
“Naduh u Ïaiong, 2024 ngi la aiti haduh 25 tylli ki aplikeshon. Ngi la ïakren ruh da ka ktien bad ka Director barim hynrei ka la shu ïalam bakla ïa ngi namarba ki kam shym la urlong satia. Mynta ka sngi ruh ngi la aiti sa kawei ka aplikeshong ha kaba ïadei bad kiwei ruh ki mat. Ngi la aiti ïa ki dorkhas sha ki MP bad sha u Lat jong ka Jylla Meghalaya la ar sien kynthih,” ka la ong.
“Ngi la phah ruh ïa ki jingthoh sha ka Ministry of Ayush ka Sorkar India bad ngi la leh katba don ki lad ki lynti ban pynpoi ki jingdawa hynrei ngim shym la ïoh satia ka jubab haduh mynta. Dei na kata ka daw kaba la pynbor ïa ngi ban pynlong ïa ka jingshah thngan,” ka la ong shuh shuh.
Kawei ruh ka jingeh kaba ki samla ki ïakynduh jingeh ka long na ka jingbym biang ki Guide ne ki Supervisor.
Na ka liang jong ka KSU NEIAH Unit ka la leit ban ai jingkyrshan ïa kine ki samla pule kiba shah thngan bad pynpaw ruh ba kin ïai don lang ryngkat tad haduh ba ki bor bahalor kin da pynurlong ïa ki jingdawa.
