Nongstoiñ, Naiwieng 28: Ka jinglynshop jong ki bor mariang ha une u snem 2024 naduh u slap haduh u phria, ka la pynhiar arsut ïa ka jingïoh lum kba ki nongrep ha baroh ki jaka jong ka West Khasi Hills District.
Haba ïakren bad u nongïalam ba hakhmat jong ka Hill Farmers Union (HFU) West Khasi Hills u ba long ruh u General Secretary Bah Lumlang Kharsyiemlieh, u la ong ba bun hi na ki nongrep ki mad ïa ka sohsat na ka daw ka jinglynshop ka mariang.
U la ong ba ha ba pyrshang ban jinglum jingkheiñ da ka seng, ki nongrep kiba ju ïoh lum kba barabor haduh 20-30 byrni, mynta ki la ïoh ban lum tang 8-9 byrni haduh 13 byrni eh.
U ong ba ka rukom wan u slap bad ka jingtyrkhong slap mynta u snem ka la ktah bha ïa kiba rep kba, namar ka jingwan u slap bad ka jingrang ka bneng kam ïahap bad ka por ka jingsan u kba bad ha ka por ba un ih artad, wan lynshop sa u phria, u ba la pynjulor laki laka hapoh ka District.
U Nongïalam ka HFU u la kyrpad ïa ka Sorkar Jylla ba kan ai noh ïa ka song jingïarap ne ka Relief Fund, ba ju sam da ka Ophis u Deputy Commissioner sha ki nongrep kiba shah ktah na ka jinglynshop u phria kumba la pyntip da ka District Agriculture Officer ka WKH.
