Palat spah ngut yn mih ki dkhot ka HANM na Shillong ban pynlong jingïakhih ha Delhi
Shillong, Risaw, 29: Da ki spah ngut ki dkhot jong ka Hynñiewtrep Achik National Movement (HANM) kin sa mih na Shillong ha ka sngi Balang mynta ka taiew ban leit sha Delhi na ka bynta ban ïashim bynta ha ka jingïakhih ka ban sa long ha ka 1 tarik, Naiwieng, 2023 ha Jantar Mantar kum shi bynta ban dawa ïa ka Sorkar Pdeng ba kan pynurlong noh ïa ki lai tylli ki mat jingdawa jong ki paidbah ka Jylla Meghalaya.
U General Secretary ka seng u Bah Kyllang Thongni ha u kyrwoh ba la phah sha ki lad pathai khubor u la ïathuh, “ka mat jingdawa kaba nyngkong ka long ba ka Sorkar Pdeng ka dei ban burom ïa ka rai jong ka Iingdorbar Thawaiñ ban pynrung noh ïa ka ktien Khasi bad Garo ha ka Khyrnit Baphra jong ka riti synshar ka Ri India kumba ka jaidbynriew Khasi bad Garo ki la dawa la slem bha namarba ki la biang ïa ka ktien ba la thoh bad pule ha ki skul bah haduh ka kyrdan Ph.D.”
“Kaba ar ka long ba ka Sorkar Pdeng ka dei ban pyntreikam noh ïa ka Bengal Eastern Frontier Regulation Act 1873 kaba ka Iingdorbar Thawaiñ ka jylla Meghalaya ka la shim ïa ka rai ban pyntreikam ïa kane ka aiñ ha Meghalaya ban ïada na ka jingwan rung kyrthep jong ki briew kiba nabar ka jylla,” u la ong.
“Ïa kine ki ar tylli ki rai kiba la pdiang da ka Iingdorbar Thawaiñ ka jylla ka Sorkar Meghalaya ka ladep ban phah sha ka Ministry of Home Affairs ka Sorkar Pdeng hynrei kaba sngewsih ka long ba ka Sorkar Pdeng hapoh ka jingïalam jong ka Sorkar BJP kam shym leh eiei haduh mynta,” la bynrap u kyrrwoh.
“Ban kyrshan ïa ka jingdawa bad ïa ka rai jong ka Iingdorbar Thawaiñ ka jylla, ka HANM ka la shim ba kane kam kaba dei na ka bynta ka ïap ka im jong ka jylla ym dei ban shu kynton beit tang ha ka Iingdorbar Thawaiñ ka jylla, hynrei kum ka seng kaba don ka jingkitkhlieh ïa ka jylla kan leit ban pynlong ïa ka jingïakhih sha Delhi,” la ong u Bah Thongni.
Dang shen u President ka seng u Bah Lamphrang Kharbani u ong, ban pynlong ïa ka jingïakhih ha Shillong kan ktah ïa ki paidbah bad ka kam kaba sah ka dei ha ka Sorkar Pdeng bad kumta ka seng ka la shim ïa kane sienjam ban leit sha nongbah Delhi ban pynlong ïa ka jingïakhih ban pynpaw sha ka Sorkar Pdeng ba ki paidbah ki donkam ïa ki jingïada.