Nongstoiñ, K’lyngkot, 12: “Ka jingpyntreikam jong ka sorkar pdeng ïa ka Mahatma Gandhi National Rural Employment Guarantee Scheme ha baroh ki jylla jong ka ri, ka pynlong pat ba kito ki skhim jong ka sorkar jylla ki la shu bijai ei bad shu jah rngai khlem paw pyrthei shuh ha ka jylla jong khamtam eh ha West Khasi Hills District”, ong u Bah S.Diengdoh uwei na ki riew rangbah ba ju peit pyrman bha ha kaba iadei bad ka roi ka par ha West Khasi Hills.
U la ong ruh, “Ym lah ban len ba watla ka sorkar jylla ka la mang haduh ar klur tyngka ka pisa na ka bynta uwei pa uwei u MLA, ba u dei ban pyntrei ïa ki kam pynroi ha ki Constituency jong ki. Hynrei kumba long mynta katei ka ar klur tyngka ka shu kut tang ha kaba thied tin, shatri, shawla, blanket, bol bad kiwei kiwei ki jingpynlut ba rit ba ria, kata ruh katto katne bnai shuwa ban long elekshon”.
Shuh shuh, u la ong ba ha ka jingjurip jong u ïa ki shnong ha kylleng ki jaka naduh ki shnong ha ki jaka sor haduh ki shnong kiba ha ki jaka ba kyndong duh, la lap ba ka jingpyntrei kam hok jong ki dorbar shnong ïa ka skhim shi spah sngi ka la long shisha ka jingkyrkhu kaba khraw ïa ki paidbah, kyrpang eh na ka bynta kito kiba kham kyrduh ha ka ioh ka kot.
“La lap ba lyngba ka jingpyntrei jong ka sorkar pdeng ïa katei ka skhim na ka bynta ban shna ïa ki surok shnong, ki madan ïalehkai, ki pung dohkha, ki jaka pynlang jaboh, ki sem sniang, ki sem syiar bad kiwei kiwei, ka la pynlong ïa ki shnong ki thaw ba kin kiew ha ka ïoh ka kot bad ka kamai kajih”.
U la ong, “Ka da long kaba itynnad ba na ka bynta ka jingpynïaid ryntih ha ka ban pyntrei ïa katei ka skhim, ka sorkar pdeng ka la mang pisa kyrpang ruh na ka bynta ban shna ïa ki ophis treikam na ka bynta ba ki dkhot bad ki nongkitkam jong ki Komiti kaba kyrpang ba la tip kum ki Area Employment Council. Lyngba kitei ki Komiti ki dkhot bad ki nongkit kam ki hap ban shong pyrkhat kiei ki jait jingtrei ba ki paidbah ki donkam”.
Haba pyrshang pat ban wad jingmut na ki katto katne ki nongkitkam jong ki shnong kiba kham kyndong, kiba la shna ïa kiba kum kitei ki ophis treikam, ki la ïathuh ba kitei ki AEC ki dei ki Komiti ba kynthup ïa ki katto katne shnong kiba marjan kiba ka jingpyntrei ïa katei ka skhim kum ki surok shnong, ki lynti ïaid kjat bad kiwei kiwei ka dang ïa tyngkhuh bad pynïasohlang.
La ïathuh ba napdeng ki shnong ba marjan kiba dang lah ban pynïasoh ïa ki jingtrei, la shna ïa kiba kum kitei ki ophis treikam ha ka shnong kaba kham longpdeng, khnang ba ka jingtreikam kan long kaba beit bad bad ïa ki dkhot bad nongkitkam jong ka Komiti, la ju jied lang na kito ki shnong kiba ïa snoh lang ha kaba pyntrei ïa katei ka skhim.
Kawei pat ka jingmyntoi jong ki paidbah na ka jingdon jong kitei ki ophis treikam jong ka MGNREGS, ka long ba lada dei ki shnong ki bym pat ïoh jingïarap na ki nongmihkhmat ban shna ïing dorbar, ïa ki Komiti shnong bapher bapher bad ïa ki jingïalang kiba rit ki ju pynlong ha kitei ki ophis treikam jong ka skhim shispah sngi. Kumta ka la long ka jingmyntoi kaba khraw na ka bynta jong ki paidbah. La lap ruh ba ki don ki surok shnong kiba la ïoh ban siang rong lyngba katei ka skhim shipah sngi kaba la long shisha ka jingkyrkhu kaba khraw ïa ki nongshong shnong.
