Tura, K’lyngkot, 12: U Myntri Rangbah ka Jylla Conrad K Sangma, hynne ka sngi ba-ar, ula buh ïa u mawnongrim ban tei ïa ka Ophis ba thymmai jong ka Chokpot C&RD Block bad ïa ka Building jong ka Degree College ha Chokpot, South Garo Hills.
ïa ka Ophis ka Chokpot C&RD Block yn tei ha ka jingmang pisa ba kot T. 2 klur katba ka jingtei ïa ka Building jong ka Degree College kan kot haduh T. 2.81 klur ïa kaba la bei pisa da ka NEC.
Haba kren ha ka jingïalang, u Myntri Rangbah ula ong ba ka jingtei pynheh ïa ki jingtei/Ophis kan pynmyntoi bha ïa ki paidbah ka thaiñ Chokpot.
“Ngi kmen shibun ban lah pynurlong ïa ka jingkular ba ngi la ai sha ki paidbah ka Chokpot. Kane ka Ophis ba thymmai kan pynthikna ba ki jingshakri ka Sorkar kin long kiba janai bad ka ban pyndep ha ka por kaba biang” ula ong.
U Conrad u pyntip ba ka Sorkar kala dep buh ïa ka mang pisa na ka bynta ban tei ïa ki Ophis thymmai jong kiwei kiwei ki C&RD Block kiba don ha kylleng ka Jylla.
Haba kren bniah bha halor ka jinglong jingman ka pule ka dangle ha ka thain Chokpot, u Myntri Rangbah ula ong ba kane ka Building ba thymmai jong ka College kan kyntiew bha ïa ka rukom ai jinghikai hapoh ka thaiñ.
“Ngi sngewthuh ïa ka jingeh jong ki samla pule ka thaiñ Chokpot namar ka jingbym don ki jaka pule jong ki Higher Education. Ka Sorkar kala shim ïa ki sienjam ban pynthikna ba ki samla pule kin nym duh ïa ka lad ban leit pule ïa ki kyrdan kiba kham shajrong” ula ong.
U Conrad ula shim ruh ïa ka kabu ban pynsngew-thuh ïa ki paidbah halor ki flagship programme jong ka Sorkar ba kynthup ïa ka FOCUS bad FOCUS+.
