Nongstoiñ, Jymmang 11: Ka jingbym biang jong ka mobile network ha ki shnong khappud ka la buh jingeh haduh katta katta ïa ki paitbah nongshong shnong, kata la ka long ban ai jingtip halor ki jingjia bad kiwei kiwei ki jingdonkam katkum ka juk.
U bah P.Snar uwei na ki samla rangbah jong ka Kyrshai, haba pyntip ha u nongthoh khubor halor katei ka jingbym biang jong ka mobile network, u la ong ba na ka liang jong ki riew rangbah bad don ruh ki nongïalam sengbhalang kum ka FKJGP, kiba la leit ban ïakynduh ïa u Deputy Commissioner barim ka West Khasi Hills, ban kyrpad ïa u ba un ïakren bad ka Telecom Department jong ka sorkar.
Utei u rangbah u la ong ruh ba ha katei ka jingleit ïakynduh jong ki riew rangbah ïa u Deputy Commissioner, ki la aiti ruh da ka jingthoh ba un shimkhia bad pynsted ïa ka kam. Hynrei kumba ka long haduh mynta ym shym pat long kam ei ei.
Kumba long haduh mynta, ka Airtel Kompeni ka la wan ban buh ïa u tower ha shnong Kyrshai la slem, hynrei ym don Network. Kane ka la wanrah ka jingeh sha ki paitbah kiba ïakynduh jingeh, khamtam eh ki khynnah skul bad ki samla pule kiba donkam ban thoh ïa ki kot ki sla bad bad ban ïaleh exam da kaba shu online.
U la ong ruh ba bun bah ki shnong kiba don ha katei ka thaiñ, ki dei ki shnong kiba hap hapdeng ka jingïakajia khappud bad ka Assam. Kumta ka mobile network ka donkam haduh katta katta, namar lada don kino kino ki kynrum kynram ki shem shitom ban pyntip ha ka por kaba biang.
Ha kajuh ka por, u la ong ba ka sorkar Meghalaya ka la buh ïa ka Border Police Out Post ha Kyrshai bad ka jingbym biang jong ka network, ka buh jingeh ruh wat ïa ki pulit ba kin pyntip ïa ki jingdonkam ha u Superintendent of Police jong ka District, khamtam ïa ki kam ki bym da donkam ban da pynlut sngi ha ka ban wan haduh Headquarter ha Nongstoiñ.
