Palat 6 lak klur tyngka bei ka sorkar pdeng ban kyntiew ïa ka NE ha baroh ki liang: Shekhawat
Shillong, Jylliew 16 : U Myntri ka Ministry of Culture and Tourism u Gajendra Singh Shekhawat ula pyntip ha ka sngi Ba-ar ba “Palat 6 lak klur tyngka ka sorkar pdeng ka la bei pisa ban kyntiew ia ka thain North East (NE) ne thain Shatei Lam Mihngi ha baroh ki liang kata naduh u snem 2014”. Ka Sorkar Pdeng ka shim khia haduh katne ban pynkylla ïa ka thaiñ kum ka jaka pdeng na ka bynta ki lad pynïasoh, ka khaïi pateng, ki kam jngohkai bad ka jingseng kam.
Haba kren ha ka jingïalang pynwai jong ka North East India Infrastructure Summit & Exhibition 2026, u Shekhawat ula ong ba ki jingbei pisa ki kynthup naduh ki surok Highway, ki lynti rel, ki kad liengsuiñ, ki lynti na Um, ki digital network bad ki project pynmih bording.
Ula ban jur ba ki jingpynroi ïa ki jingtei “ki ïaid palat na ka jingshna surok bad jingkieng, hynrei ban shakri kum ka lad ban pynïasoh ïa ki briew bad ki kabu, ki jingshakri bad ki ïew”.
U Myntri ula pynpaw ruh ïa ka bynta ba kongsan jong ka thaiñ Shatei Lam Mihngi kum ka “khyrdop ka India sha Southeast Asia” bad ong ba ka jingkwah ki nongseng kam ha ryngkat bad ka “jingdon kyrhai ki lad ha ka kam jngohkai” hapoh ka thaiñ, kala nang kiew nalor kane ka jingpynlut kaba mynta.
Haba khot ïa ka jingkiew ha ka roi ka par kaba neh, u Shekhawat ula ong ba ka roi ka par ka dei ban pynleit jingmut ha ka “jingpynbiang tarajur ïa ka jingkiew ka ïoh ka kot bad ka jingpynneh ïa ka mariang bad ïa ka riti dustur”.
Ka NEIINFRA summit, bala pynlong da ka Sorkar Meghalaya bad la pynïaid da ka Federation of Industry & Commerce of North Eastern Region (FINER) lem bad ka Build India Foundation, ka la wanrah lang ïa ki nongthaw policy, ki nongïalam na ki karkhana bapher bapher, ki nongseng kam bad ki riewshemphang ban ïakren halor ki jingdonkam kiba hakhmat eh jong ka thaiñ Shatei Lam Mihngi.
Kane ka summit ba ar sngi ka la kut noh ha ka sngi Ba-ar hadien ka jingïakren halor ka jingïatehlok, ka jingkynshew kam bad ka roi ka par kaba neh ha ka thaiñ baroh kawei.