Palat 4 klur pynsyrwa kai ka Sorkar ia ka pisa da kaba siew tulop ïa ki Chairman bad Co-chairman
Shillong, Jymmang 23: Ka Hynniewtrep Youth Council (HYC) ha ka sngi Ba-ar ka la sei madan ïa ka kam pynsyrwa kai ka sorkar MDA 1 ha kine ki san snem kiba la leit ïa ka pisa u paidbah da kaba thung da ïa ki ar tylli ki konsil bym ju treikam eiei katba ka jingsiew kaba ka pynlut tang na bynta ka tulop ki chairman bad co-chairman ka la palat ïa ka 4 klur.
Haba kren sha ki lad pathai khubor, u General Secretary ka HYC u Bah Roykupar Synrem u la ïathuh ba kat kum ka RTI ba ka seng ka la pan na ka tnat Planning ka sorkar jylla la lap ba hapoh kane ka tnat ka sorkar ka la pynkha ïa ki ar tylli ki konsil ba kynthup ïa ka Meghalaya Economic Development Council (MEDC) bad ka Meghalaya Resource and Employment Generation Council (MREGC) bad baroh ar tylli kine ki konsil kim ju shong jingïalang satia ban ïakren ne ai jingmut sha ka sorkar.
“Kaba sngew lyngngoh ka long ba wat shisien ruh kine ki konsil ba thaw ka sorkar jylla kuim ju shong jingïalang ba ïakren ïatai na bynta ban ai jingmut sha ka sorkar kumba la bynshet ha ki hynrei wat la katta ki kat kum ka RTI la paw ba ki 4 .3 klur tang ban siew ïa ka tulop sha ki chairman. co chairman, vice chairman bad kumta ter ter,” u la ong.
U La ïathuh ruh ba kat kum ka RTI ka seng ka la lap ba ka sorkar MDA1 ba la ïalam da ka NPP naduh u 2018 haduh 2023 ka la thaw ïa ka Meghalaya Economic Development Council (MEDC) kaba don u Chairman, u Co-Chairmen bad Vice –Chairmen bad baroh kiba dei ki nongkit kam suda ka party ba don ha ka sorkar.
“Kat kum ka RTI la pyntip ba kane ka MEDC kan ai jingmut ban thaw ïa ki polisy ban kyntiew ïa ki kam karkhana bad ka ïoh ka kot ha ka jylla hynrei kim ju shong pyrkhat wat shisien ruh ban ai jingmut katba ki saw ngut kiba la thung kum ki Chairman bad Co chairman bad kiwei ki la shim ïa ka pisa kaba kot T.1,55,02,266 tyngka,” u la ong.
Shuh shuh u la ïathuh ba nalor kane ka sorkar hapoh ka tnat Planning ka la thaw sa kawei pat la konsil ïa kaba la tip ka Meghalaya Resource and Employment Generation Council (MREGC) da ka jingthmu ban ai jingmut sha ka sorkar ban wanrah ïa ki lad aikam ai jam.
“Kat kum ka RTI ngi lap biang ba kane ka konsil ruh kam ju shong jingïalang satia shisien ruh hynrei ka sorkar ka la pylut haduh T. 2,87,18,941 tyngka ha kine ki san snem ban siew ïa ka tulop ïa u Chairman, ki Co-Chairmen, ki Vice-Chairmen bad kiwei katba ki pat kim ju ai jingmut eiei sha ka sorkar,” u la ong.
“Tang ha ka tnat Planning la thaw ar tylli ki konsil bad ka jingpynlut ka poi T. 4,42,21,207 ha kine ki san snem bad lada wad jingtip sa sha kiwei lei kin dang bun kiba kum kine,” u la ong.