Kyrpad ka FKJGP ïa u CPMG ban ailad ban thoh eksamin da ka ktien Khasi bad Garo

Shillong, Jymmang, 23: Ka Federation of Khasi Jaiñtia and Garo People (FKJGP) ha ka sngi Baar ka la aiti da ka jingthoh ha u Chief Post Master General (CPMG) jong ka North East Circle, Shillong ban kyrpad ïa ki bor pynïaid jong kane ka ophis ba kan pynsangeh shwa ïa ka jingthung kam ha ki 445 tylli ki post Gramin Dak ïa kiba yn sa pynmih shen bad ban ailad ïa ki trai jylla ka jylla Meghalaya ban thoh eksamin da ka ktien Khasi bad Garo.
Katkum ka dorkhas ka seng ka la pynpaw ba ka Ministry of Communication, Department of Posts, ka Sorkar India ka la ban thungkam haduh 445 ngut ki Gramin Dak Sevak, ki Branch Post Master bad ki Assistant Branch Post Master na ka bynta ban thung ha ki Post Office ha ki bynta bapher bapher jong ka jylla Meghalaya ha kaba ïa ka jingthungkam yn sa leh noh shen.
Ha ka jingïakren bad ki lad pathai khubor, u President jong ka FKJGP u Bah Dundee C. Khongsit u la ong ba ki kyndon ba la buh ka long ban thoh eksamin da ka ktien Hindi bad ka English.
“Hynrei lada ïanujor bad kiwei ki jaidbynriew nabar ka jylla, ki samla wadkam jong kane ka jylla Meghalaya kin ïakynduh jingeh namarba ki hap ban thoh ïa ka eksamin da ka ktien English katba kiwei pat ki jaidbynriew ki ïohlad ban thoh ïa ka eksamin da ka ktien Hindi kaba pynsuk shikatdei eh ïa ki,” ong u Bah Khongsit.
Ka seng ka la kyrpad ban pynrung ruh ïa ka ktien Khasi bad Garo ha ki kyndon thoh eksamin khnang ban plie lad ïa ki samla trai jylla jong kane ka jylla Meghalaya ha ka ïohkam ïohjam.
Ha kajuh ka por, ka seng ka la aiti da ka jingthoh ha u Myntri Rangbah ka Jylla u Conrad K. Sangma ban tuklar lem ïa kane ka jingdawa jong ka seng khnang ba ki samla wadkam na kane ka jylla Meghalaya kin ym duhnong satia ha ka ïohkam ïohjam hapoh ka ophis jong u Chief Post Master General, North East Circle.
Ha kane kajuh ka sngi ki nongïalam ka seng ki la leit ban ïakynduh ïa u Commandant jong ka District Home Guards ka East Khasi Hills u Bah Mawdaker Marweiñ ban ïoh jingpynshai kaba kham bniah hadien ba ka seng ka la lap ba bun na ki karkhana kiba don ha kylleng ka jylla ki ju aikam Security da ki briew kiba nabar jylla da kaba kyntait ban thungkam da ki trai ri trai muluk.
U Bah Dundee Khongsit u la ïathuh ba u Commandant jong ka District Home Guards ka East Khasi Hills u la ïathuh ba kane ka shlem treikam ka ju pynrung ïa ki Volunteers da kaba ai jinghikai pyntbit bad hadien kata la pynrungkam ïa ki sha ki Agency bad ki tnat treikam kiba donkam ïa ka jingshakri jong ki.
U la ïathuh ba ka jingbym thungkam jong ki bor pynïaid karkhana da ki trai jylla ka dei namarba ka jingsiew tulop ka kham duna lada thung da ki briew kiba nabar jong ka jylla bad lada thung da ki Volunteer ba la ïoh jinghikai pyntbit na ka Home Guard ka jingsiew kan long katkum ki kyndon ba la buh da ka Sorkar.
“Ngi ngeit skhem lada ka Sorkar ka lah ban thaw da ka polisi ha ki Kompeni ne wat ha ki kharkhana kaba nyngkong eh lada donkam ïa ki nongtrei Security ki dei ban shim shwa na ka tnat Home Guard,” la bynrap u Bah Khongsit.