Shillong, Jymmang 23 : U Hardeep S. Puri, Myntri ba dei khmih ïa ki tnat Housing and Urban Affairs bad Petroleum and Natural Gas u la batai ïa ki dkhot jong ka consultative committee jong ka tnat Housing and Urban Affairs shaphang ka jingïaid shaphrang jong ka Smart City Mission. U la ong ruh ba ka jingpyntreikam ïa ka Mission ha ki nongbah ka dei kaba peit da ka Special Purpose Vehicle (SPV), kaba don ka bynta kaba kyrpang ha ka jingpeit ïa ki projek khnang ban pyndonkam lut ki lad ha kane ka mission kaba prat lynti thymmai. U Myntri u la ong ba ka lawei jong ki jaka sor ka India ka ïoh jingmyntoi bha na ki jingsaiñdur thymmai ha kine ki 100 tylli ki smart city.
Ka Smart City Mission ba la sdang ha ka 25 tarik u Jylliew, 2015 ka thmu ban pynbiang ïa ki jingdon jingem, ka mariang kaba khuid bad kaba lah ban ïaineh bad ka rukom im kaba biang ïa ki briew lyngba ka jingpyndonkam ïa ki ‘smart solution’. Ki 100 tylli ki nongbah ba shah jied ha ka jingïakhun kaba ar bynta ki dei ki ban shah kyntiew kum ki Smart City bad kine mynta ki la ïaid shaphrang ha kane ka kam.
Ka Smart Cities Mission, kaba peit da ka Apex Committee ba long khlieh duh da u Secretary ka tnat Housing and Urban Affairs, ka ai man ka por ïa ka kaiphod jong ka jingpyntreikam ïa ki projek lyngba ka Real Time Geographical Management Information System (GMIS). Katkum ka SCM Statement bad ki Guideline, la seng ïa ka Smart City Advisory Forum (SCAF) ha ki nongbah ban ai jingmut bad plie lad ïa ka jingïatreilang jong kito kiba don bynta ha kane ka kam. Ka kynthup ïa ki Member of Parliament, ki dkhot ka Legislative Assembly, Mayor, District Collector, ki samla, kito kiba la pyntbit ha ki kam teknoloji bad kiwei kiwei kiba don bynta ha kane ka kam. Baroh 100 tylli ki Smart City ki la seng ïa ki SCAF. Haduh mynta ki Smart City ki la pynlong palat 756 tylli ki jingïalang jong ki SCAF.
Shuh shuh, ha ki jylla, la seng ïa ki High Powered Steering Committee (HPSC) ba longkhlieh duh da u Chief Secretary. Ha ryngkat kane, ki Nominee Director ka tnat Housing and Urban Affairs kiba don ha ki Board jong ki Special Purpose Vehicle (SPV) ki peit man ka por ïa ka jingïaid shaphrang jong ki kam ha ki nongbah. Shuh shuh, ka tnat ka ïakren man ka por bad ki Jylla / Smart City lyngba ki video conference, ki jingïalang, ki jingleit jngoh ïa ki jaka treikam, ki regional workshop bad kiwei kiwei ban peit ïa ka rukom treikam jong ki nongbah bad ban ïalam lynti ïa ki ban pynbha shuh shuh ïa ki kam.
Shuh shuh, ka Committee ka la leit jngoh ïa ki jaka bapher bapher ba pyntrei ïa ka projek kynthup ka ‘Mandovi Riverfront Promenade,Flood Mitigation Works bad Integrated Command and Control Centre ha Goa bad peit bniah ïa ka jinglong jingman mynta bad ka jingïaid shaphrang ka kam haduh ka 1 tarik Jymmang, 2023 ha kaba la ban ba ka Mission ka don kumba 7,800 tylli ki projek ba shongdor T. 1.8 lak klur ha kaba kaba 5,700+ ki projek (73%) ka shongdor T. 1.1 lak klur (60% ka dor) kidei kiba la pyndep. La khmih lynti ba ki projek ba dang sah baroh yn pyndep hashuwa ka 30 tarik Jylliew, 2024. Kumjuh ruh, la batai ha ka jingïalang ba la pyllait T. 38,400 klur hapoh ka Smart Cities Mission haduh ka 1 tarik Jymmang, 2023, ha kaba T.35,261 klur ladep pyndonkam.
ïa ka jingïalang la pynïaid da u Hardeep S. Puri, Myntri ba dei khmih ïa ki Tnat Housing and Urban Affairs and Petroleum & Natural Gas. U Kaushal Kishore, Myntri Khynnah, MoHUA; ki dkhot jong ka Parliament na kylleng ki Jylla, u MVV Satyanarayana, u AKP Chinraj, Ramesh Bidhuri, Sanjay Kaka Patil, Abir Ranjan Biswas, ka Kalpana Saini, ka Vandana Chauhan bad kiwei kiwei ki heh ophisar na ka Tnat Housing and Urban Affairs, Sorkar India ki la ïashim bynta ha ka jingïalang jong ka Parliamentary Consultative Committee hynnin janmiet. Ka Shalini Agarwal, Commissioner, Surat; u Divyank Singh, CEO, Indore Smart City; u M. Prathap, CEO, Coimbatore Smart City; u Ankit Khandelwal, CEO Agra Smart City, ruh ki la ai ki jingpynshai halor ki rukom treikam kiba biang ba la pdiang ha ki nongbah jong ki.
U Myntri khynnah, u Kaushal Kishore u la ïaroh ïa ka sienjam jong ka Mission ha ka jingsdang ïa ki Integrated Command and Control Centre (ICCC) ha baroh 100 tylli ki smart city. “Ki ICCC ki wanrah jingtip da ka jingpyndonkam ïa ki teknoloji bad ki pyni ïa ki ophisar kiba peit ïa kane ka kam ba kin lah ban peit ïa ka kam kaba man ka sngi, ki jingeh lane ki kam kiba mih syndet lyngba ki SOP kiba bniah,” u la ong. U la bynrap ba ki ICCC ki la long ki jaka pdeng jong kine ki smart city bad long ruh ka dak kaba biang ban pyndonkam ïa ka teknoloji ban pynkhlaiñ ïa ki kam pynroi sor.
Shuh shuh, ka Kalpana Saini ka la ban halor ka jingdonkam ban kyntiew shuh shuh ïa ka Smart Cities Mission; ha kaba ka Vandana Chauhan ka la ïaroh ïa ki ICCC bad ka jingtreikam jong ki ha ka por jong ka khlam COVID-19 bad kiwei kiwei ki jingeh na ka bynta ka jingïada ïa ki khlam; u AKP Chinraj u la ban halor ka jingdonkam ban wanrah ka jingtbit ha ki bynta ba kongsan kum ka leit ka wan, ka jingpeit ïa ka jingïoh um bad ka rukom bret niut bad kiwei kiwei ha kine ki nongbah; u Ramesh Bidhuri u la ïaroh ïa ka jingpyntreikam ïa ki sienjam smart city da kaba wanrah ïa ki rukom treikam kum ka Ease of Living Index bad ka Climate Smart Cities. Shuh shuh, ban kyntiew ïa ki kam, u la pynpaw ka jingdonkam ban ai jingtip paidbah.
Ka jingpyntreikam ïa ka Smart Cities Mission, kadei ka jingsdang jong ka por ba thymmai ha ka kam pynroi sor kum ka sienjam sha ka jingpynkylla ïa kane ka kam, ka jingpynshlur ka jingkyntiew ïa ki jinglong ka ïoh ka kot, ka jingai jingshakri Sorkar katkum ka juk mynta, ka mariang kaba khuid bad kaba ïaineh, ki jaka paidbah ba iphuh iphieng, ka jingïoh ïa ki lad digital, ki lad jingsumar bad ka jingkhuid jingsuba, kaba kyntiew ïa ki nongbah. Ka Tnat Housing and Urban Affairs, Sorkar India ka kut jingmut ban kyntiew ïa ka ease of living index ha ka jingai jingshakri ïa ki nongshong shnong.
